SUKWAHI sa unang pamahayag, si Presidente Rodrigo Duterte dili makatambong sa paglusad sa countdown sa ika-500 ka adlaw sa Quincentennial celebration sa Kadaugan sa Mactan karon, Sabado, Disyembre 14.
Kini ang gikompirmar ni Dr. Rene Escalante, chairman sa National Historical Commission of the Philippines (NHCP), apan wala kini mohatag og igong rason.
Posible hinuong makigpulong ang presidente atol sa kalihukan pinaagi sa live video.
Matod ni Escalante nga bisan dili na modayon ang presidente gipaabot nga mabulokon gihapon ang selebrasyon nga magdungan sa Manila ug Davao.
Gikatakdang mohulip kang Duterte isip pinasidunggang dinapit sa kalihukan mao si Department of Tourism (DOT) Secretary Bernadette Romulo-Puyat.
Gipaabot nga mamulong atol sa kalihukan si Manila Mayor Francisco Moreno, Davao city Vice Mayor Sebastian Duterte ug Lapu-Lapu City Mayor Junard Chan og tag singko minutos sa live video.
Alas 5:00 sa hapon gikatakdang magsugod ang kalihukan sa Hoops Dome sa Brgy. Gun-ob. Sa dili pa kini sugdan usa ka wreath-laying sa Liberty Shrine sa Barangay Mactan ang himuon ug sundan kini sa usa ka engrandeng fireworks display ug pagpasiga sa higanteng lantern sa dapit.
Sa alas 11:00 sa buntag gikatakda usab ang pag-abot sa mga opisyales sa Butuan ug Palawan sa Liberty Shrine sakay sa “Balangay” nga sugaton usab sa mga opisyales sa kagamhanan sa dakbayan sa Lapu-Lapu ug NHCP.
Gipahibawo ni Escalante nga gawas sa Liberty Shirne sa dakbayan sa Lapu-Lapu laing 20 ka mga heritage site sa nasod ang dungan nga pasigaon sa alas 6 sa gabie agi ug pagpakita sa mga dapit nga nahimong simbolo sa atong kasaysayan gatusan ka tuig na ang milabay.
Ang maong mga lugar mao ang Sheik Makhdum sa Tawi-Tawi; Agusan Gold Image Monument sa Butuan; Martyr of Bangkusay Monument sa Macabebe sa Pampanga; Sultan Kudarat Monument sa Cotabato City; Kenan Aman Dangat sa Basco, Batanes; Franciso Dagohoy monument sa Danao, Bohol; Unesco World Heritage Site sa Vigan; Bonifacio National Monument sa Caloocan City; Quince Martires Monument sa Naga City; Emilio Aguinaldo Shrine sa Kawit, Cavite; Santa Barbara Church sa Sta. Barbara, Iloilo; Gregorio del Pilar Shrine sa Tirad Pass, Ilocos Sur; Balangiga Memorial sa Balangiga, Eastern Samar; Ayuntamiento de Manila sa Intramuros, Manila; Dambana ng Kagitingan sa Pilar, Bataan; Jose Abad Santos Monument sa San Fernando, Pampanga; Higinio Mendoza Monument sa Puerto Princesa; Leyte Landing Site sa Palo sa Leyte; Tomb of Unknown Soldier sa Taguig City; Rizal Memorial Park sa Rizal Park sa Manila; ug Peace and Unity Monument sa Davao City.
“I took a glimpse of the possible message of the president and I think he will send the message that let us put Lapu-Lapu in his proper place,” pagpasabot ni Escalante.
Samtang gipahibawo ni Mayor Chan nga gumikan sa limitado nga kapasidad sa Hoops Dome dili tanan makasulod sa venue aron mosaksi sa kalihukan.
Dili maguol ang dili makasulod sanglit live man kini sa TV sa ug ingon man sa Facebook.
Giawhag usab niya ang mga motirtsta sa pagsunod sa traffic advisory aron dili mahasol. (GCM)