Nadela: Ang Santa Claus sa Opon

NANGHAKOT na ang uban og pinaskuhan. Apan duna pay daghan ang wa pa makadawat. Usa kanila mao si Jesus Abelardo nga taga Pajo, Lapulapu City. Nailhan siya sa angga nga Jessie ilabi na sa iyang mga higala ug kliyente. Nanginabuhi isip canvasser sa mga motorista nga gustong magpa renew sa insurance sa ilang sakyanan.

Sa kilid sa Land Transportation Office sa Lapulapu nimo siya makit-an adlawng tanan. Didto sab siya nako mailaila niadtong Huwebes sa hapon kay natayming nga may tuyo ko sa maong dapit. Didto sa gamayng tindahan ni Nel Medez nako nasayran ang talagsaon nga gawi ni Jessie nga maisip nako nga usa ka Santa Claus ning panahon sa Pasko. Si Santa Claus nailhan nga tinubdan sa kaaghop sa kasingkasing tungid sa iyang pagka mang gihatagon. Mao sab si Jessie. Wa man tuod siyay kapasidad nga manghatag sama ni Santa Claus pero ang iyang gibuhat niadtong hapona di kabayran og sapi. Ingon ani ang estorya.

Samtang nagpaabot si Jessie og kliyente sa usa ka bahin sa kilid sa LTO, may nakit-an siya nga sudlanan og lisensiya. Iyang gipunit og sa iyang pag-abli nag-akal ang tibuok tagsa ka libo ka pisos. Wa may tawo sa palibot nga nangita iyaha kining gidala ngadto sa tagdumala sa nag negosyo og drug testing sa duol. Si Jaireh Yongco maoy iyang gidangpan og maoy niihap sa kuwarta. Moabot kini og P14,600 pesos. Sunod niyang gibuhat mao ang oagpangita sa tag-iya.

Sa asoy ni Nel Medez may batan-on nga nipalit niya og mainom. Susamang batan-on ang nibalik sa agi og mabalak-on nga nangutana kong duna bay nakapunit sa iyang kuwarta. Mao tong gianunsiyo dayon ni Nel sa mga tawo sa palibot kong may napunitan ba sila.

Tuod man si Jessie, niabot og niuli sa salapi kauban ni Jaireh human mapamatud-i sa tag-iya nga iyaha ang nag-akal nga salapi. Ang tag-iya mao si Jayrun Dolfh Paradero, 18 anyos. Wa nami mag-abot pero pinaagi sa text iyang gitug-an nako nga ang maog salapi igbabayad sa shop nga nag-ayo sa sakyanan sa itang magulang.

“Saludo gyud ko sa ka honest ni Noy Jessie. Wa gyud ko magdahum nga mabalik pa ang nawala nga salapi”, asoy ni Jayrun sa text diri nako.

Si Jessie nga nagpanuigon na og 57 anyos niingon nga ang salapi nga di imo kinahanglan nga ihatag nimo og balik sa tag-iya. Sama kang Santa, nanghatag tuod si Jessie og birtud sa pagka matinud-anon ning panahon sa Pasko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph