Albor: Sugilanon sa drugas

MAKAPANDOL sa kaugmaon ang drugas. Ang naggumon sama sa usa ka buhing-patay. Gikan sa laing kanasoran samtang dunay shabu laboratory dinhi sa nasod.

Druglords nga mikatap ang mga gaway Jaguar Diaz, Franz Sabalones, Kerwin Espinosa ug Peter Lim. May gang ug bigtime drug groups. Mikuyanap sa mga bilanggoan.

Sa New Bilibid Prison ang mga konbiktado nagnegosyo og drugas sila Peter Co alyas Wu Tuan, Herbert Colanggo alyas Ampang, Jaybee Sebastian, Engelberto Durano, Jaime Pacho, Noel Martinez ug Noel Arili.

Unom na ka listahan ang gihuptan ni Pres. Rodrigo Duterte. Una, ang 159 ka mga politiko, huwes ug kapolisan lakip nila Gen. Vicente Loot, Marcelo Garbo, Bernardo Diaz, Joel Pagdilao ug Edgardo Tinio.

Ikaduha, ang watchlist sa mga narco-politicians nga naglakip nila Noynoy Aquino, Mar Roxas, Franklin Drilon, Antonio Trillanes ug Leila de Lima.

Ikatulo, listahan sa PDEA nga gitugyan ngadto ni Duterte naglakip sa 117 ka mga konsehal sa barangay ug 90 ka mga kapitan nga nag-apil nila Denden Bas sa Lagtang, Talisay; Ramonnette Durano sa Suba, Danao ug Bibiano Cabaron sa Palanas, Ronda.

Ikaupat, nagtug-an sa 226 sa pink ug blue book ni Mayor Rolando Espinosa sa Albuera, Leyte. Ikalima, sa PRO 7 nga listahan nga gitugyan ngadto ni Duterte sa 85 ka mga politiko, protektor ug ang namaligya. Ikaunom, kadtong giyagyag ni Duterte ang 45 ka narco-politician sa 82 kanila nga naghingalan gihapon sa duha ka Sugboanon sila Daanbantayan Mayor Vicente Loot, San Fernando Vice Mayor Fralz Sabalones ug Rep. Ching Veloso sa third district sa Leyte.

Wala na maapil si kanhi Mayor Mike Rama human malimpyohi ang iyang ngalan. Nahadugang ang gibutyag ni Baguio Mayor Benjamin Magalong bahin sa ninja cops nga maoy responsabli sa shabu recycling.

Hulyo 2016-Mayo 2019 miabot na og 6,600 ang napatay lakip na sa mga badlongong kapitan, konsehal, mayor, bise mayor, abogado, polis, PDEA, uban pa.

Gipatay kay misukol sa mga tinugyanan, nagkaribal nga sindikato, nag-unay kay walay remittance, inilogay sa hurisdiksyon, gisakyan sa gikabingkil, vigilantes ug kadtong wala mohunong sa ilegal nga negosyo. Apan hangtod karon wala masumpo sanglit sayon ang kwarta, nakagdan ang utok sa bisyo, pagtumaw sa bag-ong drug players ug dunay shabu recycling.

Bintaha kay kon talawan pa ang lider sa nasod dayag nga ibaligya ang drugas sama sa isda sa kamerkadohan. Vice Pres. Leni Robredo nagsigig tagawtaw nga pakyas ang maong kampanya midason sab si Sen. Panfilo Lacson. Gihagit ni Duterte si Robredo nga maoy mangulo sa kampanya batok drugas. Apan wala magdugay gitaktak isip co-chair sa ICAD kay nagpakaulaw sa nasod misumbong hinoon sa US govt. ug UN Office on Drugs and Crime. (csa_1156@yahoo.com / 09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph