Binghay: Way perpektong relasyon

DAGHAN nang pamilya ang nangabungkag tungod sa hatod-hatod ug hinimo-himong stismis nga way klarong tinubdan. Ang kadaot kay ang kasagarang na-apektuhan ang mga inosenting mga anak nga sa ngadto-ngadto kuyaw ma diskaril sa ilang padungan.

Karong adlawa, ang mga bana maoy akong pontariya. Aron di mo-ulbo ang kaspa ni misis sa ka high blood, diay akong mga suhistiyon nga ginbuhaton sa mga bana aron ma menus-menusan ang away og kagubot.

Kung nasuko o gisapot si misis, ayaw kini og surang-suranga kay segurado mopaingon sa pag-ulbo sa kaspa. Hinuon, palayo una kadiyot hangtod nga mabugnaw iyang paminaw ug mo hurang iyang kalagot. Ayaw bagta ang kalayo.

Paninguhaa nga makabaton og self control. Mas bali pang magpalayo una o ba kaha magpahangin sa gawas aron di ma piskan sa kalagot ug kasuko ni misis.

Hinundumi nga way problemang di masulbad kay ang tanan dunay kasulbaran, di lang diha-diha dayon makita ang sulosyon busa mas maayo nga lingkuran ug estoryahan ang isyu aron ma klaro ug way kaligot-got nga mabati.

Kung nasuko si misis daghang mga di maayong pulong ang manggawas sa iyang baba nga di tinuod ug wa tuyoa busa ayaw kini dibdiba o isulod sa imong alimpatakan aron di masakitan.

Ayaw idalo ang imong halok ug gakos sa imong mga anak ug asawa. E-unlimited kini kay ang ugma way kasiguruhan nga moabot unya makapagaan sab kini sa buot kay bation man nila nga sila imiong gimahal ug importante sa imong kinabuhi.

Ayaw hikawi sa pagdayeg si misis bisag unsa ka gamay o dako sa iyang nabuhat. Ang pagdayeg maka pahiyom, maka-palipay og makapa-ingganyo og maayong buhat.

Importante sab sa magti-ayon ang respito ug pagsalig sa usag-usa gawas sa gugma. Kini makapalig-on sa sa relasyon.

Himuang imong best friend imong asawa kay sa ngadto-ngadto kamong duha ra gihapon ang mag-inunungay hangtod sa katiguwangon.

Katapusan ang abre nga komunikasyon. Ang pag-estroya ug pagpaminaw sinugdanan sa maayong pagsinabtanay ug kibuhing tunhay ug hamugaway.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph