DUNA karoy giumol nga resolution ang kongreso nga mag-amendar sa 1987 Constitution diin ang tumong ug tuyo mao ang paglugway na unya sa ilang kaugalingong termino ug sa ubang local elected officials.
Si Cagayan de Oro congressman Rufus Rodriguez mikompirmar niini ug gani, matod niya, nga aprobado na kini sa kongreso sa usa ka closed-door executive session niadtong Miyerkules.
Hinuon, ipaagi pa kini og debati sa plenary nga sugdan sunod semana aron ipapasar sa Enero 2020.
Ubos sa resolution, himuong lima ka tuig ang usa ka termino sa mga sakop sa kongreso, local officials ug lakip na usab ang mga senador. Ang mga nahisgutan makadagan ug makaserbisyo sa tulo ka sunodsunod nga termino kon modaog.
Magkunhod man tuod kini og usa ka tuig sa termino sa mga senador, (kay sa kasamtangan unom man ka tuig ang usa ka term) apan posibling makombinsi gihapon sila niini kay magtugot man sab kini kanila nga makadagan og tulo ka sunodsunod nga termino – imbis duha ra.
Gisukip usab sa resolution nga dugangan ang mga senador gikan sa 24 ngadto na sa 27.
Dili na unya pud mahitabo nga gikan sa managlahing partido ang presidente ug ang iyang bise kay sama sa US, kon unsay boto sa kandidato pagka presidente mao na man usab kini ang boto sa iyang bise.
Sa gitumbok nga mga local officials, ang makalulooy mao ang mga opisyal sa barangay kay wala diay silay labot niini nga unta sila man maoy perming gisaaran sa mga kandidato sa matag national elections.
Lisod usab tuohan ang giingon ni Rodriguez nga sa Enero 2020 ilang ipapasar ang maong resolution kay ubos sa Konstitusyon, ang pag-usab sa batakang balaod kinahanglan pa og constituent assembly o constitutional convention dayon ipaagi og national referendum.
Kon dili sila mosunod niini, sa ato pa, illegal ang maong resolution.