SUPERBALITA CEBU

SWU-Phinma Cobras kampiyon sa 2019 Mingla Mayor's Cup

3-PEAT. Ang Southwestern University-Phinma Cobras mao'y kampiyon sa 2019 Minglanilla Mayor's Cup Christmas League human nila mapildi ang University of Southern Philippines Foundation Panthers sa championship game, Huwebes, Disyembre 13. Kini mao'y ilang ikatulong kampiyonato karong tuiga sa Cebu basketball. (Hulagway kuha ni Jun Migallen)

NAGPADAYON ang dominasyon sa Southwestern University (SWU)-Phinma Cobras sa Cebu basketball sa dihang gipukan ang University of Southern Philippines Foundation (USPF) Panthers, 90-81, sa championship game sa 2019 Minglanilla Mayor's Cup Inter-collegiate Christmas League sa Sports Complex sa lungsod sa Minglanilla, Cebu Huwebes, Disyembre 13.

Ang panaghugpong sa import nga si Thiam Lamine ug sa kasamtangang Most Valuable Player (MVP) sa Cebu Schools Athletic Foundation, Inc. (Cesafi) nga si Shaquille Imperial sa katapusang bahin sa fourth quarter mao'y naghatag og kasiguro-an sa Cobras nga malangkat ang ilang ikatulong sunodsunod nga kampiyonato dinhi sa Sugbo.

Ang SWU-Phinma nga mao usab ang kampiyon sa Partner's Cup ug sa Cebu Schools Athletic Foundations, Inc. (Cesafi) men's, maoy nagkontrolar sa duwa sulod sa tulo ka mga quarters diin nakaposte pa gani kini og 18 puntos, 61-43, nga gibuwak-buwakan sa tres ug hansak ni Lamine.

Sa katapusang singko minutos sa panag-engkuwentro, ang Panthers ning higayona misandig usab sa ilang import nga si Sameen Swint ug mipaulbo sa ilang kaugalingong rally.

Inabagan nila ni Genesis Paulo Estardo, Neon Aleikem Chavez, Rodelio Cauba Jr. ug John Miguel Maglasang, ang USPF mitibhang sa labaw ug mihudlat sa SWU-Phinma, 77-84, dos minutos kapin ang nahabilin sa fourth quarter.

Apan ang duha ka sunodsunod nga undergoal stabs ni Imperial mao'y mibingat og balik sa labaw nga ila mao usab ang nagpatay sa paglaom sa Panthers.

Ang SWU-Phinma misulod sa finals human gipalagpot ang defending champion University of the Visayas (UV) Green Lancers niadtong Miyerkules, Disyembre 13.

Sa panagtigi alang sa ikatulong dapit, yanong gipukan sa UV ang University of San Jose Recoletos, 87-76.

Gawas sa championship trophy, ang Cobras miuli usaab nga may P100,000 cash samtang P60,000 ang sa Panthers. Ang UV miangkon sa P30,000 ug P15,000 usab ang nahipos sa USJ-R.

Dobleng selebrasyon ang nakuha ni Lamine sanglit mao usab kini ang napiling MVP. Gawas sa MVP trophy aduna pa kini P5,000.

Kauban ni Lamine sa mythical five mao sila si Gileant Delator (UV), Elmer Echavez (USJ-R), Swint (USPF) ug Imperial (SWU-Phinma).

Subay niini, sa ngalan sa lungsod sa Minglanilla nga gipangulohan ni Mayor Lanie Pena ug Vice Mayor Loben Geonzon, si municipal administrator Concordio Mejias mapasalamaton kaayo sa koperasyon nga giitsa ngadto sa mga partisipante, sa mga sponsors, sa mga kaabag kaniya sa pagpadagan sa tinuig nga torneyo ug ngadto sa tanang mga misaksi sa matag gabii nga duwa.

Mga puntos:

SWU (90) - Thiam 28, Imperial 12, Roncal 11, Cachuera 11, Fernandez 6, Sanchez 5, Polican 3, Boc 3, Bilao 2.

USPF (81) - Swint 30, Estardo 13, Chavez 8, Cauba 7, Aguilar 7, Mendez 7, Ursal 5, Cabatingan 2, delos Reyes 2. JBM


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph