KAY guba ang armas, wa mapatay sa usa ka sekyu ang usa sab ka security guard nga iyang gitionan og armas alas 9:30 sa gabii niadtong Biyernes, Disyembre 13, sa SIR New Matina, Davao City.
Ang nasikop mao si Christopher Echalar Saromenez, 39 anyos, residente sa Maco, Davao de Oro kinsa kasohan og attempted murder.
Subay sa spot report gikan sa Davao City Police Office (DCPO), giingon nga misulod ang suspek sa balay sa reklamante nga si Armando Omega Bongbong, 53 anyos, usa sab ka security guard ug residente sa SIR New Matina, Phase 2, ning siyudad kinsa nangita sa usa ka alyas Marcus.
Kalit suma pa nga mipagula og armas ang suspek dayon gition sa reklamante ug gikablit ang gatilyo, apan wala kini kabuto kay daut, hinungdan nga naglayog sila ug nakadagan ang suspek apan nasikop kini sa Manga Street, Juna Subdivision, ning siyudad.
Nasayran sab nga ang suspek giingong mag-usa ka semana nang dunay relasyon sa kapuyo sa reklamante nga maoy usa sab sa hinungdan sa ilang away.
Ning kasamtangan, ang suspek gibalhog sa selda sa Talomo Police Station samtang giandam na ang kaso nga ipasaka kaniya didto sa korte. (Jeepy P. Compio)