LAING gituohang drug pusher na sab ang namenteryo human giingong misukol atol sa drug bust sa Sta. Ana Police Station niadtong Biyernes, Disyembre 13, sa Sta. Lucia, Barangay Centro, Agdao, Davao City.
Ang suspek nailhang si Johmel Angelia Estrada, alyas Jomel, 22 anyos, promodiser ug nag-renta og boarding house sa Zone 5, North San Juan, Barangay Centro, Agdao, ning siyudad.
Sumala ni Police Major Michael Uyanguren, hepe sa Sta. Ana PNP, nga dugay na nilang gipanid-an ang ilegal nga lihok sa suspek hangtud miabot sa takna nga gilusad na ang buy-bust operation.
Gisulayan pa og dala sa Southern Philippines Medical Center ang suspek apan gideklara kining dead on arrival.
Nakuha sa posisyon sa suspek ang usa ka Rock Island Armory .9mm caliber dunay serial number 1812702 nga dunay bala ingon man mga basiyo sa armas nga gigamit sa pagpabuto sa suspek ngadto sa pulis.
Lakip nga nakuha gikan sa suspek ang mga pakite sa gituohang shabu ug ang marked money.
Gipanganti sa kapulisan nga ilaha gayod mapatay ang suspek labi na kung mabutang na sa alanganin ilang kinabuhi diha sa operasyon. (Jeepy P. Compio)