USA ka makuting imbestigasyon ang gihimo sa Davao City Police Office (DCPO) sa pagpusil-patay kang Barangay Gumitan, Marilog District, kapitan Fernando Banayao ug ang asawa niini niadtong Sabado sa buntag, Disyembre 14, sa Purok Mundo Hills, Sitio Quarry, Marilog District, ning siyudad.
Sa impormasyon nga nakalap sa Superbalita Davao, nasayran nga nagmaneho sa motorsiklo si Kapitan Banayao diin angkas niini ang iyang asawa.
Gitaparan suma pa ang biktima og nakamotorsiklo dayon gipusil sila sa makadaghang higayon hinungdan nga natumba ang ilang motorsiklo diin dead on the spot ang kapitan samtang nadala pa sa ospital ang asawa.
Sumala ni Police Captain Philip Dave Uddin, hepe sa Marilog Police Station, usa ka makuting imbestigasyon ang ilang gihimo aron masuta ang hinungdan sa kremin ug maila ug masikop ang mga mamumuno.
Giingon nga pag-abot sa asawa sa kapitan sa Isaac Robillo General Hospital sa Calinan, nakabsan sab kini sa kinabuhi.
Dugang impormasyon nasayran nga aktibo si Banayao sa anti-New People’s Army campaign sa gobyerno sa ilang dapit.
Usa ka hot pursuit operation ug makuting imbestigasyon ang gihimo karon sa kapulisan ug kasundalohan sa dapit.