HUMAN sa pipila ka mga digrasya sa ilang mga barko, ang Jomalia Shipping Inc. nipasalig nga di na kini mausab human sila mokuha og consultant.
Nagmabinantayon na usab sila, matod ni Mark Lua, sales and marketing director sa Jomalia Shipping.
Ang labing uwahi nga insidente nahitabo niadtong Oktobre 28, 2019, diin nitakilid ang ilang barko nga MV Mika Mari 3 samtang nagpakanaug sa rolling cargo sa Danao City.
Nibutyag si Lua nga nakig-partner na sila sa Safe Ships isip ilang maritime consultant nga eksperto sa safety standards sa barko.
Sukad sila nikuha sa serbisyo sa Safe Ships, ila nang gi-standarnize ang ilang mga crew pinaagi usab sa traning.
Dungag niya nga tabangan usab sila sa Safe Ships sa pagbansay sa ilang maintenance crew, ilabi na ang mga mga nagdumala sa makina, labing importanteng bahin sa barko.
Ila usab nga himuong moderno ang ang ilang mga vessels aron bag-o ang ilang maserbisyo sa ilang mga pasahero.
WA NAY LOUNGE FEE
Sa samang higayon, subling gipaneguro ni Lua nga wa na sila magkobra og lounge fee nga P20 sukad sa miaging buwan.
Nasabutan sa shipping company, Gobernador Gwendolyn Garcia ug Kongresista Vincent Franko “Duke” Frasco nga undangon na ang pagkolekta sa lounge fee sa mga pasahero nga manukad sa Dakbayan sa Danao padung sa pantalan sa Consuelo, San Francisco, mga isla sa Camotes.
“Nagplastar gyud mi sa didto kay wala may lugar nga ting-issue og ticket. Mao na gi offeran mi nga adto mi mag-issue og ticket and at the same time dili mi pabayron og rent. Ang ila rang pangayuon kay ang P20 nge fee until gipahunong last November 2019 kay mura lagig nahug nga gina force ang mga tawo,” pasabot ni Lua. / JCT