ANGAY nga susihon og maayo sa Department of Health ang nahitabo sa usa ka buwan nga masuso nga namatay human mabakunahi sa Eversley Child Sanitarium. Gawas nga maghatag og hustisya ug closure sa mga ginikanan sa bata ang resulta, mapanagan-an usab nga masubli ang hitabo kon pananglitan ang bakuna maoy hinungdan.
Gikinahanglan usab ang imbestigasyon aron patubagon ang angay nga manubag sa kamatayon sa masuso. Kinabuhi baya ang nahanaw.
Di usab maayo nga tungod sa kamatayon sa masuso, likayan na ang pagpabakuna kay wa pa gani masuta kon mao ba ni ang hinungdan sa kamatayon sa bata. Wa pa say kaso nga nakompirmar nga ang bakuna makamatay. Tumong ini mao ang pagpanalipod sa kinabuhi sa masuso.
Nitumaw pagbalik ang mga sakit, sama sa polio nga dugay na untang nawagtang, sukad nangahadlok ang mga ginikanan sa nahitabo sa pagbakuna sa Dengvaxia. Gilangaw ang mga vaccination program sa kagamhanan bisan kon ang kontrobersiya naglibot ra sa Dengvaxia.
Bisan gani ang mao nga bakuna wa man mamatud-i nga makadaut sa bata nga nabakunahan kon nakaagi na siya og dengue fever. Nakaplagan lang nga kuyaw ang mao nga bakuna niadtong mga bata nga wa pa makasuway og dengue fever. Epektibo lang kini siya niadtong mga nangaigo na.
Apan tungod sa di maayong pagkapasabot, pun-an pa sa gihimong lakang sa kagamhanan batok sa Sanofi, naundang ang programa sa pagpamakuna niini samtang ang mga ginikanan nanglikay sab sa ubang mga vaccination program.
Busa taliwa ning nahitabo sa masuso, di maayo nga likayan na ang pagpabakuna. Kay hangtod lagi karon, wa pay bisan usa ka kaso nga nagpakita nga duna kini dautang epekto sa kabataan nga madapatan. Kay bisan unsaon, ang kaayuhan nga dala sa bakuna mas mahinungdanon ug bug-at kay sa kakuyaw nga produkto lang sa pangisip, di diay tinuod.