PAMPANGA

Garcia: Simbang Galingaldo na naman bukas! (It’s Dawn Mass once more tomorrow!)

Kapisik

“YA A linalang king Plyeyades at Roryon and manalili

king malalam a dalumdum bang maging munag,

Ya mu naman ing magpadulum king aldo bang maging bengi,

Yang mamaus king danum ning dagat at mibubulus karela king balat ning yatu,

ing GINU Ya ing lagyu Na.”

~Amus, Dangka 5: Sunis 8

(Amos 5:8)

“Mengari Yang aslag ning munag ampat mamanlag ya ing aldo, abak a alang biga,

Kabud ing banayad a dikut sirut ya king yatu, kapamilatan ning aslag aldo kaybat ning uran.”

~Kadwang Aklat nang Samwel, Dangka 23: Sunis 4

(2 Samuel 23:4)

“Inya mirikilan kung bulan ning kelangulaga,

at ding bengi ning kaligaligan mitungkul kanaku.

Kabang makakera ku kanakung sabyan, ‘Kapilan ku tikdo?’

Dapot ing bengi malaus ya, at balabalaus kung biling-biling angga na king galingaldo.”

~Yob, Dangka 7: Sunis 3-4

(Job 7:3-4)

“Ing Dyos ati yu king libutad na, e de agalo;

Ing Dyos saupan ne ampat ing munag na datang.”

~Dalit, Dangka 46: Sunis 5

(Psalm 46:5)

“King abak, kabud mitas ne ing aldo,

sukat kang tikdo maranun at mamirapal munta king lungsud;

at lawen mu, potang ya at ding memalen a kayabe na lumwal lang salang keka,

sukat mung gawan karela nanu man ing agyu mu.”

~Ding Talapanatul, Dangka 9: Sunis 33

(Judges 9:33)

“Ding taung lalakad king dalumdum manakit lang dakilang sala;

Detang mabibye king metung a maralumdum a balayan, ing sala mamanlag karela,.”

~Isayas, Dangka 9: Sunis 2

(Isaiah 9:2)

“Kanita ing aslag mu sunlag yang mengari king galingaldo,

at ing kapaldanan mu mabilis sumibul;

At ing katalarwan munta king arapan mu;

ing ligaya ning GINU yang bante king gulut mu..”

~Isayas, Dangka 58: Sunis 8

(Isaiah 58:8)

***

Galingaldo. Ing pilatan ning dalumdum ning kapitangan bengi at sala ning paratang a munag. Nung mipatudtud ka at ala kang piyakitan nung nanu nang oras—keraklan apagkamalyan mu—isipan mu bengi pa mu rin at buri mu pang isundu ing pamanudtud mu. Dapot karing talasuyu ning Ginu, ing galingaldo ing dake ning aldo bang makapangadi at mibule-bule king pamisamak da king Apung Ginu—ing karelang palsintan at inya pin sa pekamaulagang dili para karela.

Keng panyatang na naman ning Simbang Galingaldo o (Bengi karing aliwa), dakal na la na naman ding masasal migising maranun bang makasimba at dakal la karela ing magpanatang pupusan da ing apulung aldo ning misa at tagunan da ngan iti angga na king Kapaskwan—isadsad da na.

Mekad ali-aliwa ing sangkan ning panata da reng balang tau. Ating bisa lang tumagun king Simbang galingaldo bang makikit kareng kakaluguran o kaluguran da. Deng ping aliwa kareti e la man lulub keng pisamban at karen la mung suluk-suluk a madaladalumdum bang e la binang mayakit kareng aliwang tau, lalu na kareng kamaganak o pengari da.

Deng aliwa, ba’da la mung apangpangaya deng bayu rang imalan at sapatus a Under Armour, Converse a Chuck Taylor, Asics Tiger, Nike o Hush Puppies o nanu-nanu pang mangamal a sapatus. Deng aliwa pagyabang do reng bayu dang saling iPhone o Samsung S11 o Note 11 o mekad Vivo o aliwa pang bayung lwal a cellphone ngeni.

Deng aliwa bisa la mung makapangang bubusuk a bibingka o putu bumbung a kapagpagpagpag pa ibat keng tukil. O mekad keng maranun memusning Pusung a Kambubuyug o Tatang Ronald. Malagad na la mung tutu reng tatagun king Simbang Galingaldo bang makadalo king Apung Ginu at aganaka ing panyatang ning Ginung Talapanatbus keti sulip.

***

Dake Talabaldugan:

lambó/lambú¹ – (palagyu) borlas, pabito keng imalan o nanu mang susulud. English: tassel, fringe, tuft. Alimbawa king pamangamit: “Mailig yang mangabit lambu keng baru na ing lalaking yan inya apapagkamalyan deng binabai deng balang manakit kaya.”

lambó/lambú² – (palagyu) mekalag o kelagan, melubak o linubak pangatali. English: unravelled, unsnarled, untangled. Alimbawa king pamangamit: “Lambu ne pangagapus ing makasukul inyang lakwan da inya pala mekatakas yang e da amalayan.”

lambóng/lambúng – (palagyu) pandung, talukbung pampaldas, bumbung. English: mourning mantle. Alimbawa king pamangamit: “E no misusulud lambung ngeni reng babaing makipaglibing uli kanung e manayun ing makatalukbung.”

lambót/lambút¹ – (palagyu) kalambutan, pangalambut. English: softness, tenderness to touch and to the bite and chewing. Alimbawa king pamangamit: “Aburi da ing lambut ding bibingka nang Tasi inya pin dakal ya apipisali kesa kang Isang at Ating.”

lambót/lambút² – (palagyu) pangalembut, pangakulembut, lata, pamaglata katawan. English: bodily weakness. Alimbawa king pamangamit: “Kanita pa mayakit na ing labut na ning lalaking yan inya alang bisang miyabe kaya keng nanu mang ligligan singkasikan.”

***

GAWING MEKALINGWAN KARING KAPAMPANGAN!

Ing tumayla metung yang patune kenng lambis da reng ima o ninu mang pengari kareng bingut da pang supling potang buri da na lang patudturan o kabang yuyuyu da la keng duyan da. Ngeni gagamit na lang cellphone da at ilang patigtigan dang dalit da reng dayu at e man pin kundiman o basultu. Pane naming “Baby Shark” o aliwang nursery rhymes a papalwal da keng YouTube. Tutung malapit nang makalingwan ing sadyang gawi tamu kanitang pamagtumayla.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph