SUPERBALITA CEBU

Diola: Hapit na, hapit una

Mao Diay

NAKAUBAN ko sa kasaulogan sa Solemnidad sa Birhen Maria sa Guadalupe didto sa simbahan sa Guadalupe, Dakbayan sa Sugbo, niadtong Disyembre 12. Didto usab ang embahador sa Mexico dinhi sa Pilipinas, si Senyor Gerardo Lozano Arredondo. Nahibaloan nako gikan sa iyang asawa nga si Mariza nga hangtod diay karon aduna silay Misa de Gallo sa alas 4 sa kadlawon, apan magsugod lang kini sa Disyembre 12. Gikan diay sa Mexico ang Misa de Gallo. Ang pagdumala baya sa España sa Pilipinas gipaagi sa Mexico. Lakip niini ang mga bulohatong relihiyoso. Gani sa unang panagtagbo ni Santo Juan Diego ug sa Birhen sa Guadalupe ang tuyo ni Juan mao nga makasimba siya sayo sa buntag. Posibleng Misa de Gallo kadto ang iyang padulngan.

Magsugod na pod ugma ang Misa de Gallo, Lunes Disyembre 16. Sunoy ang gipasabot sa “gallo” nga samtang nagatuktugaok kini nagamisa usab. Nobenaryo kini nga gipahinungod sa Birhen mao nga puti ang bulok sa liturhiya. Magsaksaksinagol ang Adbiyento ug Pasko kay Pasko na man ang Misa de Gallo bisag wala pa ta moabot sa Disyembre 25.

Nangutana si Juan nga Magbubunyag kang Jesus: “Ikaw na ba ang taliabot, o magpaabot pa ba kami og lain?” Buot ipamatuod ni Juan nga si Jesus ang Mesiyas kay napriso na man si Juan ug nangita siyag bunga sa iyang pagpangbunyag. Gipasultian ni Jesus si Juan mahitungod sa mga milagro nga iyang ginabuhat aron pagmatuod nga siya ang Mesiyas.

Unya iyang gimatuod usab ang misyon ni Juan sa kasaysayan sa kaluwasan nga si Juan maoy nag-andam sa dalan alang kang Jesus. Dugang pa niini, “Sa mga gipanganak og babaye, wala pay mitumaw nga labaw kang Juan nga Magbubunyag; apan ang labing gamay sa gingharian sa langit labaw pa kaniya”. Hapit na makaabot si Juan, apan hangtod pagpunting ra gayod siya kang Jesus. Ang Karaang Kasabotan pagpangandam sa Bag-ong Kasabotan.

Gilarawan ni propeta Isaias ang kabag-ohan nga pagaaboton, sama sa disyerto nga mabuhong sa mga buwak ug mga bakol nga kusog moambak. Kining larawan nga gipaambit ni Isaias natuman ni Jesus. Diha kaniya nanagtagbo ang kalipay ug ang pagmaya! Apan usa kini mahitabo taastaas pod ang pagpangandam. Ang kinatumyan sa maong pagpangandam gisimbolo ni Juan nga Magbubunyag.

Gikinahanglan ang pagpailob sa maong pagpangandam. Sa pulong pa ni Santiago, “Tan-awa kon giunsa pagpaabot sa mag-uuma ang bililhong bunga sa yuta, nagmapailubon niini hangtod madawat ang sayo ug ang ulahing ulan.” Daghan tag makat-onan sa mag-uuma: “Ikaw usab kinahanglan magmapailubon. Palig-ona ang imong mga kasingkasing, tungod kay ang pag-abot sa Ginoo haduol na”.

Makaingon pod kita nga, kon si Juan nga Magbubunyag mao ang kinatumyang pagpangandam sa Karaang Kasabutan, ang Birhen Maria mao kinatumyan sa pagdawat sa Bag-ong Kasabutan. Tungod kay hapit na ang Pasko, kinahanglan mohapit usa kita sa atong Inahan.

Kumusta ang atong relasyon sa Birhen Maria?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph