DAGHANG nagtuo nga ang mga tawo nga slim maayo og panglawas. Unya ang tambok di maayo og lawas. Mao na nga makugang kita kon nganong dunay namatay nga slim og lawas. Daghan ang nakugang sa pagkamatay sa Taiwanese-Canadian actor Godfrey Gao kay slim and fit siyang tan-awon.
Duna usab koy nailhang mga tawo nga nangamatay bisan sige sila og pasingot ug slim and fit tan-awon. Makugang lang ka kay kalit lang ni collapse samtang nagduwa og basketball. Naa usab gani triathlete nga ni-collapse ug namatay.
Lisod i-judge ang lawas sa tawo pinaagi sa external nga pagtan-aw. Ang mga medical test ang labing sakto nga makahiling sa lawas sa mas tukma nga paagi. Kay naa gani tawo nga slim, sama sa akong usa ka higala, apan taas diay kaayo siya og cholesterol. Nakadawat siya og warning sa doktor.
Naulian ra ni human sa duha ka buwan nga exercise ug limit sa iyang pagkaon.
Busa importante diay ang tinuig o makaduha sa usa ka tuig nga medical tests ug exams, labina kon naa ka na sa middle age. Daghan na ang mga sakit nga motumaw human sa katuigan nga pangabuso sa lawas.
MEDICAL EXAM
Niini, importante nga kon naa ka na middle age, magpa medical exam una ka mo-engage og sports o bisan unsa nga klase sa exercise. Kon mag-exercise man gani, gikinahanglan usab nga ang lawas dunay pahuway aron kini maka-recover gikan sa stress sa pag-exercise.
Sa kaso ni Gao, dihang namatay siya sa cardiac arrest, 17 ka oras siyang way pahuway. Sa ato pa, stressed ang iyang lawas hinungdan sa cardiac arrest. Usa sab ini kay kanunay siyang kuwang sa tulog. Sa kadto nga shooting, grabe ang iyang physical activity.
Niabot ang panahon nga naningil na ang lawas. Mao tingali nga nipalyar ang kasingkasing. Kon ang makina nagkinahanglan og pahuway, unsa na kaha ang lawas? Gikinahanglan ani ang pag-recuperate.
WAY TUG
Maayo gani kay wa ko mag cardiac arrest niadtong kusog pa kong mag mountain biking. Naa guy duha ngadto sa tulo lang ka oras ang akong tulog. Kini tungod diay sa caffeine sa akong system nga nalab-anan ug di na makaya sa lawas.
Bisan sa kakuwang sa tulog, mosikad gihapon ko kay ako usab nga gikombate ang possible depression tungod sa pagkamatay sa amoang 5-anyos nga anak nga babaye.
Niresulta ni sa akong mild anemia mao nga akong giminusan ang akong biking. Gisundan sab nako sa pagpaminos sa intake sa kape. Di na ko pirme nga magkape.
Gikinahanglan gyud diay nga bisan nagsige ta og exercise, ang atong lawas atoa usab nga papahuwayon. Nahinumdom na hinuon ko sa akong suod kaayong higala ug kauban sa trabaho nga slim kaayo og lawas, apan stressed kaayo sa trabaho ug kinabuhi. Until now, di pa ko makatuo sa iyang kamatayon.