SUPERBALITA CEBU

Sugilanon: Merry Christmas, Mr. Strong!

DISYEMBRE 25. Adlaw sa Pasko. Nakamata ko tungod sa kasaba nga akong nabati sa gawas sa among balay. Bisan wa koy maayong kinatulgan kagabii kay bisperas man sa Pasko, nahitagpilaw man ko. Ug karon nagmata na ko. Kining among balay nahimutang sa sityo El Popular, Brgy. Zapatera, ning dakbayan. Nag-abang ra mi sa yuta, sama sa among mga silingan. Sa atbang sa among balay mao ang balay ni Mr. John Strong, Amerkanong naminyo og Pinay nga gitahod namong Mrs. Mary Strong. Duha ang ilang anak nga pulos babaye, katalirungan nakog edad. Karon, si Edith bayinte tres na, sama nako; si Ellen, bayinte uno. Pero silang duha tua sa Amerika magtrabaho. Sila si Mr. Strong ug si Mrs. Strong mao na lay nahibilin sa ilang balay uban sa usa ka katabang nga hamtong babaye, si Manang Bada.

Mitambo ko sa bentana sa akong lawak. Ang kasaba naggikan diay sa mga bata nga nanaygon sa among mga silingan. Ang uban namulot og mga kagar nga mga rebentador. Mao gyud kini ang esena sa among dapit inigka buntag sa adlaw sa Pasko. Magsibaw ang kabataan nga mangayog pinaskuhan. May mananaygon pod nga moabanid pag-awit kada balay.

Nabagdok ang akong panan-aw sa balay ni Mr. Strong. Pinaril kinig haloblak. Nagmingaw kini, daw wala nay nagpuyo. Serado pa ang pultahan. Unya giganoy ang akong paghandom sa kagahapon, niadtong mga bata pa mi.

Matag adlaw sa Pasko sayo sa buntag kaming mga bata sa among lugar magpundok sa gawas sa geyt sa balay ni Mr. Strong, Pasudlon mi sa katabang sa lagwerta. Di madugay mogawas si Mr. Strong nga magsul-ob sa biste ni Santa Klaus ug magsambilay og usa ka sako nga puno sa mga pinaskuhan alang kanamong mga bata. Angayan si Mr. Strong nga mag-Santa Klaus kay dako man siyang pagka tawo nga dako sab og tiyan. Molanog ang iyang kinataw-an nga sinundog niya sa orig nga Santa Klaus, “HAR! HAR! HAR!” Unya maglinya kami ug tagsa-tagsa nga moduol kaniya, mo-amen sa kamot, ug modawat sa pinutos nga gasa. Human modawat og pinaskuhan, manglingkod kami sa mga lamesa nga giandam sa lagwerta. Dayon manggawas sila si Mrs. Strong, Edith ug Ellen nga magdala og mga sanwits ug sopdrink. Mangaon kami nga puno sa kahimuot ug kalipay. Nahimo kining tulomanon ni Mr. Strong kada Pasko.

Samtang kami mangaon mokanta si Mr. Strong sa ‘Kasadya Ning Taknaa.’ Larino siyang moawit sa maong awit sa Pasko, daw usa ka lumad nga Sugbuanon. Dayon mamakpak kami. Tawgon ko ni Mr. Strong aron mangulo pagkanta og mga Christmas Song nga Iningles. Awiton namo ang ‘Silent Night, Holy Night’, ‘Joy to the World’, ‘Santa Claus is Coming to Town’, ‘I’m Dreaming of a White Christmas’, ug uban pa. Unya mamatikdan nako nga pahiran ni Mr. Strong ang iyang mga mata sa iyang palad. Nisantop sa akong linghod nga panghunahuna nga tingali nahinumdom siya sa Pasko sa bata pa siya didto sa Amerika.

Gikan sa mga bata nga nagyagaw didto sa ubos mibalik ko paglantaw sa balay ni Mr. Strong. Naabli ang pulta mayor. Nakita ko si Mr. Strong nga naglingkod sa iyang ‘wheelchair’ nga gitulod ni Mrs. Strong paingon sa lagwerta. Gibati kog kaluoy sa Santa Klaus sa among dapit nga tiguwang na, sukwahi sa tinuohan nga si Santa Klaus bata og nawong ug dili matiguwang bisan pa sa pagpanglabay sa katuigan. Nahibawo ko nga tulo na ka tuig ang nakalabay sukad na-stroke si Mr. Strong. Tulo na sab ka tuig nga wa siya makapanghatag og pinaskuhan sa mga bata sa among dapit. Nanaog ko sa ubos ug mipaingon sa kusina. Didto si Nadine, akong asawa, nagluto sa among pamahaw. Wa pa momata si Katrine, among duha ka tuig nga panganay. Gikuha ko ang ‘cake’ gikan sa ‘ref’ aron ihatag ko kang Mr. Strong.

Kay wa man itrangka ang geyt, midiretso kog sulod ug miduol sa nahimutangan nilang Mr. Strong ug Mrs. Strong. “Merry Christmas, Mr. Strong!” matod ko nga mitunol kaniya sa ‘cake’ nga nahisulat sab ang akong gipamulong. Mipahiyom siya kanako. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph