SUPERBALITA CEBU

'Ikaw ang nakakita sa maayo nako'

SA ubang manag-uyab, kon bag-o pa ang relasyon, ang mga nindot ug maayo nga batasan ang ipakita sa usag-usa.

Kini aron mauyonan o magustohan sa babaye o lalake nga gihigugma.

Apan alang kang Mark Anthony Oporto, 32, kon unsa ang iyang tinuod nga pagkatawo, mao usab ang iyang gipakita ngadto sa babaye nga iyang gihigugma, si Judith Ocaña, 30.

Nag-abot ang dalan sa duha dihang pulos sila nitambong og kasal niadtong Disyembre 28, 2016. Si Judith ang usa sa mga bridesmaid sa kasal sa iyang suod nga higala sa kolehiyo.

Ang iyang kapares mao si Mark.

Pagkasunod adlaw, gi-add ni Mark si Judith sa iyang mga higala sa iyang Facebook account.

Ug dinhi nagsugod ang sugilanon sa gugma sa duha.

Si Mark, usa ka process engineer sa usa ka pribadong kompaniya sa siyudad sa Lapu-Lapu, naila nga chicksboy o yano lang ang pagpanguyab sa lainlaing mga babaye.

Apan sa iyang pagpangulitawo kang Judith, daw nausab ang tanan. Panington siya mohatag og buwak kang Judith.

Niadtong Pebrero 14, 2017, gisugot ni Judith si Mark sa simbahan sa Birhen sa Regla sa dakbayan sa Lapu-Lapu.

Nakahilak ang lalake dihang nabatian nga gidawat sa babaye ang iyang gugma.

“Dili tanan bugoy nga lalake kay bugoy. Naa siyay soft side inside,” sigon ni Judith.

Niadtong Septiyembre 26, 2018, ni-propose og kasal si Mark kang Judith sa usa ka movie house sa Lapu-Lapu City.

Sa pangutana ni Judith kang Mark nganong siya ang gipili niini nga makauban sa iyang tibuok nga kinabuhi, si Mark nitubag, “Ikaw ang nakakita sa maayo sa akoa. Ikaw ang nakadawat sa bati sa akoa.”

Matod ni Judith, communications specialist sa Visayan Electric Company (Veco), importante alang niya nga sa pagsugod pa lang sa ilang relasyon, gipakita ni Mark kon kinsa siya.

“Dili always best foot forward. Ipakita nimo kung unsa gyud ka. Mao na ang important sa relasyon,” dugang ni Judith.

Ang duha ka nilalang nahiusa sa gugma sa Ginuo niadtong Oktubre 26, 2019 sa seremonyas sa kasal sa Archdiocesan Shrine of St. Therese of the Child Jesus sa Barangay Lahug, siyudad sa Sugbo.

Ang reception gisunod sa Mandarin Plaza Hotel, dakbayan sa Sugbo. / SCG


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph