SA IKADUHANG sunodsunod nga katuigan, ang mga magduduwa, team officials ug ang uban pang mga sakop sa pamilya sa Philippine Basketball Association (PBA) makasaulog sa adlawng Pasko sa ilaha mismong panimalay.
Si PBA commissioner Willie Marcial nakadesisyon nga dili gihapon niya ipabalik ang naandan sa liga nga mopahigayon og mga duwa sa mismong adlaw sa Pasko.
Giangkon ni Marcial nga kanunay daghang mga tawo ang motan-aw sa matag pahigayon nila’g duwa sa adlaw sa Pasko apan alang kaniya, mas importante nga ikauban sa matag usa ang ilang tagsatagsa ka pamilya ning maong espisyal nga adlaw.
Ang duha ka best-of-five semi-finals series sa Governor’s Cup tali sa Brgy. Ginebra Gin Kings batok NorthPort Batang Pier ug Talk N’ Text KaTropa batok Meralco Bolts mahuman karong Disyembre 22 bisan moabot pa kini sa deciding games.
Inig ka human niini, ang mga magduduwa mahimo nang makabakasyon aron isaulog ang Kapaskuhan kauban ang ilang mga minahal sa kinabuhi.
Mobalik ang aksyon sa Governor’s Cup karon pang Enero 8 aron hatagan ang mahimong finalists nga makapangandam og insakto.
Ning puntoha, wala pa'y makonsiderar nga inilog nga makasulod sa finals.
Hinuon ang Batang Pier nakapakita na'g maayong senyales human nila gilubong ang Gin Kings sa Game 1, 120-94.
Niadtong 2017, katapusang nagpahigayon og duwa ang PBA sa adlaw sa Pasko diin gipangbuntog sa Ginebra ang Magnolia, ang Pambansang Manok Hotshots, 89-78. (ESL)