BITBIT ang taas nga moral, ang NorthPort Batang Pier mosuway pagposte’g 2-0 nga bintaha sa ilang pagpakigbatok og balik sa Brgy. Ginebra Gin Kings karong alas 6:30 sa gabii sa Game 2 sa ilang semi-finals best-of-5 series sa Philippine Basketball Association (PBA) Governor’s Cup sa Smart Araneta Coliseum.
Dili mabangbang ang nakuhang pagsalig sa Batang Pier human nila gipangmasaker ang Gin Kings, 124-90, niadtong Sabado sa gabii, Disyembre 14 sa samang venue nga nahisgutan.
Idugang pa niini ang impresibong pagpalagpot sa Batang Pier sa No.1 team NLEX Road Warriors sa quarter-finals diin kaduha nila gipukan ang Road Warriors.
Ning puntoha, sangko na seguro sa langit ang pagsaka sa moral sa Batang Pier.
Apan nasayod si Batang Pier coach Pido Jarencio nga daghan pa silang trabaho nga buhatunon aron maabot ang ibabaw hinungdan nga kinahanglan pa nilang mokayod og maayo.
"Maybe we just caught Ginebra on an off night, maybe we benefited more from the long break. But you could see we’re the hungrier team and we executed our game plan well, especially on defense,” matod ni Jarencio kabahin sa ilang kadaugan sa Game 1.
Ang import sa Batang Pier nga si Micael Qualls nagpakatap og 27 puntos aron pangulohan ang ilang kadaugan sa Game 1.
Apan nihimo’g grabeng langas sa kampo sa Batang Pier mao si Garvo Lanete, kinsa nitampo og 24 puntos lakip na niini ang unom ka three-point shots sa makonsiderar nga labing maayo niyang duwa sa PBA sukad masukad.
Si Christian Standhardinger nidugang og double-double nga 16 puntos ug 15 rebounds alang sa Batang Pier samtang nihatag og 14 puntos si Sol Mercado.
Ang Batang Pier nagsugod pagkontrolar sa duwa sa 3rd quarter ug wala na kini molingi pagbalik.
Aduna man tuod higayon nga nanghudlat ang Gin Kings apan wala ra malangan ug nadominar na sa hingpit sa Batang Pier ang duwa.
Game 1 boxscore:
NorthPort (124) – Qualls 38, Lanete 24, Standhardinger 16, Mercado 14, Anthony 11, Escoto 7, Taha 5, Elorde 5, Cruz 2, King 2. Barangay Ginebra (90) – Brownlee 24, Pringle 21, Chan 8, J. Aguilar 8, Thompson 7, Dillinger 5, Dela Cruz 4, Slaughter 4, Mariano 4, Tenorio 3, Caperal 2. (ESL)