GIBANABANA nga dul-an sa usa ka libo ka mga tawo, bata ug tiguwang, nga taga Barangay Subangdaku, dakbayan sa Mandaue nakadawat og makabuhong nga pinaskohan gikan sa pilantropo nga si Aida Patana pinaagi sa iyang program nga ‘The Aida Patana Show’ sa Energy FM niadtong Sabado sa hapon, Disyembre 14.
Ubos sa pagsuporta sa kagamhanan sa naasoy nga barangay ubos sa pagpangulo ni Brgy. Kapitan Ernie N. Manatad, ang pagpanghatag og regalo gipahigayon sa gymnasium sa Subangdaku Elementary School, nga nagsugod sa alas 2:00 sa hapon ngadto sa alas 4:00 sa hapon, diin ang tanan nalingaw sa mga duwa, raffle draws ug daghang regalo.
Usa ka inilang balladeer, stage actor ug komedyante nga si Cerge Michael maoy host uban sa iyang maanyag co-host.
Atol sa pagpanghatag sa pinaskohan, ang tibuok pamilya ni Patana nitambog sa pagsuporta sa kawsa sa ilang inahan, diin usa ka single mother, pakigduyog sa mga yano nga katawhan.
Gibutyag ni Patana nga unang programa kini niya sa barangay nga nagsugod sa Subangdaku ug plano niya nga ipahigayon usab kini sa ubang Barangay Mandaue kausa o kaduha sa usa ka buwan. Lakip sa iyang plano nga mopahihayon sa samang kalihokan sa barangay sa dakbayan sa Sugbo.
Si Patana mas naila ning ulahi human napili nga ‘Mrs. Philippnes World’ sa kompetisyon nga gipahigayon sa Paris, France niadtong Oktubre ning tuiga, apan wala siya makadayon sa world competition sa Las Vegas Vegas, Nevada, USA ning buwan dihang gi-deny siya human sa interview alang sa visa sa embadaha sa US sa Manila.
“Sige lang, maybe God has other plans for me..” mapaubsanong pulong ni Patana, kinsa mas nahagit nga ipadayon ang iyang kawsa sa pagtabang sa mga kabus pinaagi sa ginagmay nga negosyo.
Si Patana nisallkway sa mga pagsaway ug alegasyon nga plano bahin sa pulitika.
“Politics? No. Sa tinuod lang, dugay na kung gidani nga mokandidato sa barangay ug siyudad. Suod ko sa daghang politiko kay usa sa akong negosyo mao ang mga artista, may talents company ko. Sagad ako ang tig-supply og mga artista sa kampanya sa mga partido ug mga kandidato,’ matod ni Patana.
“Pero wa jud ko, ang ako lang ang negosyo. Christmas karon, di ta maghisgot og pulitika. Let’s talk about love and sharing our blessings,” dason niya.
Nganong grabe ang iyang kawsa sa mga kabus?
“Abi ninyo, ako niagi og daghang challenges sa kinabuhi. Niabot sa punto nga walang-wala jud ko sama seguro sa ubang diha (gitudlo ang audience) pero wala ko mabira sa negatibong pagbati. Mibarog ko, Miharong. Nag-inusara nga nagbuhi sa pamilya. Labaw sa tanan, wala mobiya sa pag-ampo sa Ginoo,” paambit ni Patana.
‘Mao kini ang akong gusto nga ipaambit sa kabus, moabot gyud ang inyong panahon nga molampos basta ang mga kalisod hinuon ninyo nga inspirasyon,” digang niya.
Lakip sa gipanghatag ni Patana mao ang mga t-shirts alang sa hamtong, Christmas package nga naglakip sa bugas ug noche buena, mga sandal sa mga bata, kuwarta nga premyo sa mga duwa, mga plastic nga botilya sa tubig ug styro boxes gikan sa M. Lhuillier ug daghan pang uban. (PR, RRM)