Dear Papa Joe,
Tagoa lang ko sa ngan nga Jose, 50 anyos na ang panuigon ug minyo.
Siguro taas lang ko og utong mao nga ni-survive pa ko aning sitwasyuna. Nakapatambag na ko nimo niadtong 2009 ug karon nia na sad pero susama lang gihapon ang problema, ang akong pares. Natiguwang nalang ko ug mamatay na lang siguro, di pa siguro nako maangkon ang klase sa gugma nga gusto nako sa akong asawa. Hilom kong gitago ang akong insecurities kay naa miy anak ug dako na. Kana bitaw nga gibuhat na nimo tanan sa imong pamilya para naay asenso pero di gihapon ka kadungog og appreciation. Mas daghang komento nga bati ug mas modayeg pa sa laing mga tawo kay sa ako nga gibuhat kutob sa mahimo nga wa na lay ako, puro ilaha.
Unsay masulti nimo ani? Tambagi ko.
JOSE
Jose,
Ngay, hapit na ang Pasko. Ayaw palabi, naa pay daghang nagmahal nimo. Naa pa kay anak.
Kon may pagkuwang man ang imong asawa, ayaw lang sad i-focus niya ang imong kasagmuyo though makasabot ko kay siya imong giminyuan, pero edaran na ka. Siguro be civil na lang sa sitwasyon. Murag lain man sad makigbuwag ka. Hasol pa. Pero kon worst comes to worst, nasayud na ka unsay maayo. Dawata na lang gyud na nga mao na siya kay kon wa sad ka mahala niya, siguro nibiya na siya nimo og una.
PAPA JOE
(sa inyong tampo ipadala sa papajoesuperb@gmail.com)