SUPERBALITA CEBU

Nadela: Lisod ang sakay ning panahon sa Pasko

TUNGOD sa selebrasyon sa Pasko namungingi ang mga tindahan sa daghang kustomer. Labi na sa mga tindahan nga namaligya og baratong produkto. Sale didto, sale diri.

Makalingaw ug mapuslanon kaayo labi na kong apiki ka sa budget. Tungod sab sa selebrasyon halos di na sab kalihok ang mga sakyanan diha sa karsada tungod sa grabing trapik.

Bundakan pa sa kusog nga ulan nisamot ka kumplikado ang sitwasyon. Og mao ni nahitabo niadtong Huwebes ug Biyernes sa miaging semana.

Ang daan nang naghuot nga bul-og sa trapiko nasamotan sa dihang nibundak ang uwan nianang wa pay alas 6 sa gabii pagka Huwebes. Sa usa ka mall sa Mabolo ko nagpasilong.

Akong nakita ang taas nga kutay sa mga pasahero nga naglinya aron makasalay og taxi. Bisan nituang na ang uwan, lisod gihapon ang sakay.

Sa usa ka bahin sa mall may mga taxi nga way sud apan di pud pasakay. Gipangutana nako ang mga nipara kong unsay rason.

Ang kasagarang rason sa mga drayber duna silay gikakontrata nga pasahero og ilang gipaabot. Duna say uban moingon nga padung na silang mograhe mao nga namili sila og pasahero nga maagian ang destinasyon padung sa ilang grahianan. Kon nagsulti sila sa tinuod way problema kay balido man ang mga rason.

Pero makapaduda nganong halos tanan nga naagi didtong dapita ingon ana man ang rason. Di kaha diskarte lang to aron mobungat ang pasahero nga pakyawon sa dakong kantidad aron lang makasakay? Pangutana ra ning ako niadtong mga nakasakay pinaagi sa pakyaw system. Dakong kalapasan baya ang di pag gamit og metro, dili ba?

Diay lain nga akong nadiskubrehan. Niingon ang drayber kansang taxi bakante nagpaabot daw siya sa pasahero nga wa pa makaplete. Ang pasahero naa sa sulod sa tindahan.

Ang taxi naa sa gawas nga bahin sa mall. Nilabay ang pipila ka minutos, way pasahero nga nigawas aron mobayad sa iyang plete.

Kon nagbasa ron kadtong pasahero nga nisakay, tinuod ba nga imo nalang gibayran ang 200 pesos kapin nga pletihan sa pasahero nga kuno gipaabot sa drayber, aron lang makasakay?

Manghinaot ta nga tinuod gyud tong giingon sa drayber nga wa pa siya pletihi ug biktima siya kay gipagohan.

Gipakanaug ang pasahero unya wa pa ka plete ug nisud pa gyud sa mall. Kay kong diskarte ra tong iya agi’g pahimus sa panahon nga nihit ang sakay, aw, laing modus ni nga bantayanan natong tanan.

Unsaon man nga di mabiktima ang mga stranded nga pasahero sa pagpabadlong sa ubang taxi drivers?

Palihug Land Transportation Office pagpa-roving mo og inyong mga tawo sa mga dapit nga daghang stranded nga pasahero aron naa silay daling kadangpan kon dunay magpabadlong nga drayber.

Kon duna tay police visibility mas nindot nga duna sab tay LTO visibility labi na ning panahon sa Pasko.

***

Ang Public Information Officer sa Lapu-Lapu City Government nga si higalang Oscar Pineda nasayod na sa ka honest sa taga Pajo nga si Jessie Abelardo. Siya kadtong tampo sa atong Asoy sa miaging Sabado. Iyang giuli sa tag-iya ang P14,600 nga iyang napunitan sa kilid sa building sa LTO nga di layo sa city hall sa Lapu-Lapu.

Usa ka talagsaong hiyas nga subling gipamatud-an sa usa Oponganon.

Si Jessie anak sa nitaliwan nga si Col. Jose Abelardo, usa ka dentist sa Philippine Air Force nga nagbase sa Mactan Air Base.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph