Barrita: Ulo sa pork barrel nigimaw na sab

NIGIMAW na sab ang ulo sa unconstitutional ug illegal nga pork barrel sa P4.1 trillion nga national budget alang sa sunod tuig. Gitawag kini ni Senador Panfilo “Ping” Lacson og mga last minute insertions.

Kon dunay “dragon slayer,” si Lacson na tingali ang atong matawag nga “pork barrel slayer” tungod sa iyang tinguha nga mawagtang na sa hingpit ang pork barrel system sa atong mga magbabalaod.

Kon atong kahinumdoman, nalangan ang pagpasar sa 2019 budget sa dihang nakit-an ni Lacson ang P95 bilyones nga iyang giila nga pork barrel. Ang maong kantidad gi-veto ni Presidente Rodrigo Duterete.

***

Sa giproponer nga 2020 budget, nakita ni Lacson ang insertions sa mga proyekto nga mobalor og P16.345 billion. Kadaghanan niini flood control projects sa lain-laing mga lugar nga mobalor og P60 million matag usa.

Nangutana si Lacson nganong pareho man ang budget sa mga flood control projects. Pareho ba diay ang porma sa matag sapa? Mas kwestiyonable kon dunay flood control projects sa mga lugar nga way sapa.

Sama niadtong politiko nga nisaad og taytayan sa usa ka lugar nga way sapa. “Unya congressman, wa may sapa sa amo,” matod pa sa katawhan. Tubag sa congressman, “Buhatan ta kamo og sapa pero sa sunod tuig na nga budget. Di lang nato dunganon.”

***

Si Presidential Spokesperson Salvador Panelo niingon nga i-veto ni Presidente Duterte ang last minute insertions, sama nga giyang gi-veto ang P95 billion nga gitawag ni Lacson nga pork barrel sa 2019 national budget.

Matod niya, wa mausab ang baruganan sa pangulo nga i-veto kadtong mga probisyon sa national budget nga supak sa atong Constitution. Sa ato pa ang tinuod nga pork barrel slayer mao ang atong presidente.

Apan nganong di man gyud mawagtang ang pork barrel? Matod ni Lacson, ang miaging tuig usa ka election year unya nabaraw ang pork barrel sa mga magbabalaod. Nakakolekta na sila sa kickback, apan wa madayon ang mga proyekto. Tingbayad na karong tuiga o sa sunod tuig diay.