ANG taga Davao City nga si Marc Alexander Lim mibugha og silver sa 30th Southeast Asian (SEA) Games jiu jitsu competition sa Laus Group Events Center sa San Fernando, Pampanga.
Ang 22-anyos nga nanag-iya sa Limitless Fitness & Martial Arts Gym ang nagbansay dayon human siya miabot gikan sa Games.
" I started training last night (December 11). It's right to back to work Asap. Not sure when the next competition will be but probably early next year. But regardless, I'll be training," niya sa Sun.Star Davao pinaagi sa Facebook Messenger interview.
Dugang ni Lim nga kulba-hinam sab ang pakigbugno niya sa men's jiu jitsu -69 kilograms division.
Una niyang gipildi ang Indonesian nga kaatbang via armbar dayon gilup-og ang Malaysian pinaagi sa puntos sa semifinals.
Suma niya, "My finals was my usual rival from Thailand. He's an Asian games medalist and Asian champion. We see each other in bigger comps and we have fought and beaten each other already. This time unfortunately, I lost a very close and exciting match by points."
Gipasabot ni Lim mao si Banpot Lertthaisong nga mipildi niya sa ilang gold medal match.
Ang Jiu-jitsu unang nahilakip sa karon nga tuig sa SEA Games apan ang Dabawenyo nakigtigi na niini sa Asian Indoor and Martial Arts Games (Aimag) ug Asian Games.
Niya, di sab sayon ang pagpangandam alang sa Games ilabi na nga gikan pa siya nagpa-alim sa iyang injury sa tuhod.
Suma pa nagpokus siya sa rehabilitasyon ug pagkondisyon sa Davao una miapil sa national team alang sa duha ka semana nga jiu-jitsu camp sa Japan ug dayon sa Manila.
"I've been away from home for more than two months now and I rented a condo unit with mats inside and with the jiu-jitsu gym right across the street so that I could make sure I am able to train as much as I can," dugang sa Ateneo de Davao University graduate.
Bisan og kasamtangang nakabase siya sa siyudad, nagabansay sab siya sa Manila kung may dagkong torneyo.
Labot sa cash incentives nga gitakda niyang dawaton gikan sa national government pinagai sa Philippine Sports Commission (PSC) via Republic Act (RA) 10699, nga maghatag og cash incentives sa mananaug sa SEA Games nga modawat og P300,000, P150,000 ugP60,000 alang sa gold, silver ug bronze medalists.
Luyo niana, si Presidente Rodrigo R. Duterte mohatag sab og bonus sa medalista atol sa usa ka seremonya sa Palasyo, Disyembre 18.
Gidayeg ni Lim ang gihimo sa presidente nga nagrekognisa sa paningkamot sa atleta.
Niya, "It is very much appreciated because we athletes spend most of our time away from work or business to focus on training. Like for example sa camp na eto, napabayaan ko na almost everything just to be able to focus to get that gold medal for the PH and for Davao. I am very thankful to the President."
Gidedicate niya ang iyang SEA Games silver medal sa Philippines ug Davao City.