KIDAPAWAN CITY - Gipursige karon sa Integrated Provincial Health Office (IPHO-Cotabato) ang kahinlo sa mga evacuation centers ug panglawas sa mga bakwit sa mga biktima sa linog sa probinsiya sa Cotabato.
Prayoridad sab sa provincial government ang pagkaon og mga gamit sa mga Internally Displaced Persons o IDPs.
Daghanang mga bakwit na ilabina ang mga kabataan ug mga tigulang ang nagkasakit na sa Makilala, Cotabato gumikan sa dili maayo nilang tuluganan.
Gibutyag ni IPHO head Dra. Eva Rabaya, ang labing kasagarang mga sakit mao ang hilanat, sip-on ug ubo gumikan sa init ug bugnaw nga klima.
Gumikan sa pagbalik sa sakit nga polio sa Pilipinas diin positibo ang taho nga dunay naggikan sa Mindanao partikular sa Cotabato City ug Midsayap, North Cotabato, hinungdan nga gitutokan dayon sa Department of Health (DOH) ang pagmintina sa kahinlo ug pagbutang sa mga temporaryo nga kasilyas sa mga evacuation centers.
Giklaro ni Rabaya nga wala sila'y nakita nga posibleng sintomas sa poliovirus sa mga evacuation centers sa probinsiya.
Tambag sa opisyal nga kinahanglan nga ibutang sa tama nga lugar ang mga basura aron mamintina ang kahinlo sa sulod ug gawas sa mga evacuation centers. (Edgar Fuerzas)