COTABATO CITY - Kahadlok ang gibati karon sa pamilya sa mga biktima sa mangilngig nga masaker sa Sitio Masalay, Barangay Salman, Ampatuan, Maguindanao.
Dunay uban sa pamilya sa mga biktima sa masaker ang gitanyagan sa dakong kantidad bugti sa pag-atras sa kaso.
Gihasi sab ang uban gumikan sa pagpursige nga makab-ot ang tinuod nga hustisya sa 58 nga niluog nga gipatay apil na ang 32 ka sakop sa media niadtong Nobyembre 23, 2009.
Gi-angkon sa pamilya sa mga biktima nga supak sa ilang kaugalingon ang dili pagtambong sa pagtaral sa kaso apan gikahadlok nila ang hulga sa ilang kinabuhi matag tambong nila sa korte.
Gikanayon ni Attorney Nena Santos, usa sa mga pribadong prosekyutor sa kaso, nga dili dali alang sa pamilya sa mga biktima nga ipadayon ang kaso tungod sa mga gasto sa matag tambong nila, labi na sa Metro Manila sa panahon sa mga pagdungog ug pagtaral.
Samtang nagsalig sab si Maguindanao 2nd District Congressman Esmael ”Toto” Mangudadatu nga mipabor sa mga biktima ang timbangan sa hustisya gumikan na-presenta nila ang mga testigo ug ebidensiya nga gikinahanglan sa korte.
“Tiwala naman kami sa conviction dahil nai-present ng prosekusyon yung mga testigo at ebidensya,” suma ni Mangudadatu.
Daghan sab sa pamilya sa 32 ka sakop sa media nga niluog nga gipatay ang naglaom nga makab-ot nila ang tinuod nga hustisya. (Edgar Fuerzas)