7 patay sa ‘Friday the 13th accident’

TACURONG CITY – Nabugtuan sa kinabuhi ang 5-anyos nga nahiapil sa “Friday the 13th accident” sa national highway sa Brgy. Poblacion sa siyudad sa Tacurong.

Giila ang biktima nga si Najib Mamusaka nga nagpuyo sa Barangay Uhaw, General Santos City.

Una na nga nakabsan sa kinabuhi sila Najmea Kusain, 2-anyos, Juhaiber Mamusaka,12-anyos, Juhaina Mamusaka, 9-anyos, Aipa Mamusaka, 2-anyos, Juhairi Mamusaka usa ka tuig ang pangedaron nga pulos nagpuyo sa Brgy. Fatima, General Santos City ug si Atong Ontong, 19-anyos, estudyante sa SMIT Grade 12 nga nagpuyo sa Poblacion President Quirino, Sultan Kudarat.

Nagpabilin sab nga anaa sa grabeng kahimtang sulod sa Saint Louis Hospital ang amahan sa mga biktima nga si Nasser Mamusaka, 33-anyos ug ang laing anak niini nga si Aipa, 2-anyos.

Anaa sab sa Saint Louis Hospital ang magtiayon nga sila Ariel Ypil Legada, 23-anyos ug Marielle Legada, 23-anyos nga nagpuyo sa Barangay Calean, Tacurong City.

Kahinumdoman nga niadtong kaadlawon sa 'Friday the 13th' nagginukdanay ang Montero Sports nga gimaneho ni Dr. Omar Acob, sakay ang iyang mga paryente nga sila Joher Mamalinta 21-anyos, Arnel Dansalan, 24-anyos ug Voksany Alid ug ang Toyota Hi-lux pick nga gimaneho sab ni Brent Nicole Marohombsar, 20-anyos, sakay niini sila Salman Abdul Asis, 21-anyos, Khryss Madahan, 23-anyos, Carl John Canto, 21-anyos ug Vince Harley Camarao, 18-anyos ug pulos mga nagpuyo sa Tacurong City.

Pag-abot nila sa Alunan Avenue Tacurong City didto na natigayon ang madugo nga disgrasiya sa diha nga gibanggaan sa duha ka SUV ang duha ka traysikel nga anaa sa tunga sa kalsada.

Naangin sab ang laing sakyanan nga gimaneho ni Jerald Cerebo nga natapsingan sa Montero Sports.

Gikomperma sab ni Tacurong City Chief of Police, Lieutenant Colonel Rey Egos nga pulos nakainom ang sakay sa Montero Sports ug Toyota Hilux pick-up nga gikan sa birthday party sa Koronadal City.

Nakomperma sab nga sa Koronadal City pa lang naglumba na ang duha ka sakyanan.

Pormal na sab nga gisang-at ang tukmang kaso sa mga nakabangga sa duha ka traysikel. (Edgar Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph