PANABO, Davao del Norte - Tulo ka mga indibidwal ang gikatahong gipangdagit sa grupong nagpailang taga Philippine Drug Enforcement Agency (PDEA) sa managlahing oras ug lugar sa probinsya.
Subay sa report alas 9:50 sa gabii, Disyembre 13, 2019, si Amelia Bustamante, 61-anyos, biyuda nga taga Purok Durian, Brgy. Cagangohan midangat sa Panabo City Police Station ug mitaho nga ang iyang anak nga si Arman Bustamente, 42-anyos, minyo, high school graduate ug maintainer sa fish cage pugsanong gidala sa grupo nga armado nga nagpailang mga sakop sa PDEA.
Laing reklamante usab ang midangat sa samang buhatan nga ginganlan og Ronald Villaraza, 24-anyos, ulitawo nga taga Purok Durian, Brgy. Cagangohan ang misumbong nga ang iyang igsoon nga si Ruel Villaraza, 45-anyos pugsanong gidala sa samang Grupo nga nagpailang mga sakop sa PDEA.
Base sa inisyal nga imbestigasyon, ang maong mga biktima pugsanong gipangdala sa nahisgutang grupo samtang atoa kini sa tagsa-tagsa nila ka mga puloy-anan.
Dugang gikabutyag nga sa samang adlaw, midangat usab sa Panabo City Police Station si Jose Flores, 59-anyos nga taga Purok 1, Brgy. San Francisco ug misumbong nga ala 1:30 sa udto sa maong adlaw ang iyang pag-umangkon nga si Ronnie Flores Regala, 31-anyos pugsanong gidala sa grupo sa mga armado nga nagpailang mga taga PDEA.
Matud pa nga ang maong pag-umangkon ni Flores pugsanong gipasakay sa kolor silver Isuzu D-MAX uban sa kolor orange Mazda pick-up ug kolor puti nga van yype multi-cab.
Padayon pang giimbestigahan sa kapulisan ang maong mga insidente samtang ang pamunoan sa PDEA sa wala pa mihatag og pamahayag labot sa maong pasangil. (Dexter T. Visitacion)