USA ka bag-ong fastcraft nga adunay kapasidad nga 190 ka mga pasahero ug pito ka mga crew ang nilawig niadtong Sabado sa buntag, Disyembre 14, 2019 nga adunay rota nga gikan sa Mactan Wharf ngadto sa Consuelo Port sa lungsod sa San Francisco, Camotes Islands.
Adunay 112 ka mga pasahero ang unang nisakay sa fastcraft kuyog ang 12 ka mga empleyado sa unang paglarga niini.
Sigon ni Mark Lua, sales and marketing director sa Jomalia Shipping Inc. nga nagdungag sila og bag-ong fastcraft sa maong rota tungod gihangop kini sa publiko.
“Two years nani nga rota unya mao to nakita namo nga ni-pick up siya sa market, ni-invest pud mig bag-o karon kay ni-work man gyud siya,” saysay niya.
Ang oras sa biyahe sa maong rota magsugod sa alas 8 sa buntag ngadto sa alas dos sa hapon. Alas 10 sa buntag magsugod ang biyahe sa rota nga Consuelo paingon sa Mactan hangtod sa alas 4 sa hapon. Anaay usa ngadto sa duha ka oras ang biyahe niini.
P500 ang plete sa dagko, P250 sa mga bata nga nagpangidaron og tres ngadto sa 10 anyos, P400 sa mga estudyante ug P300 ang mga senior citizen.
Aduna usab silay mga laing rota sama sa Danao port paingon sa Consuelo sa Camotes Islands vice versa nga anaa sa P100 ngadto sa P250 ang pletihan. Anaa usab silay roro nga ang rota mao ang Punta Engano paingon sa Olango Island diin ang pletihan anaa sa P12 ngadto sa P25. Ug kon sakyanan, P200 kon motor ug P700 kon four-wheels.
Dugang niya nga nakig-alayon sila sa Safe Ships aron konsultahon ang ilang safety measures human sa pipila ka disgrasya sa mga barko. (JCT)