KAPIN sa P3 milyunes nga balor sa shabu ang nasakmit sa managlahing operasyon sa City Intelligence Branch (CIB) ug City Drug Enforcement Unit (CDEU) sa Lapu-Lapu City Police Office (LCPO) sa Barangay Pajo, dakbayan sa Lapu-Lapu niadtong Sabado sa gabii ug Dominggo sa kaadlawon, Disyembre 14 ug 15.
Unang nasikop sa kapulisan alas 11:45 sa gabii sa Sitio Kamanggahan II, Pajo mao ang usa ka Jhon Rey Abella Racaza alyas “Ampat,” 22, molupyo sa dan P. del Rosario, Brgy. Sambag 2, dakbayan sa Sugbo.
Nakuhaan siya sa iyang posisyon sa usa ka sling bag nga may sulod nga unom ka dagkong mga putos sa gituohang shabu nga gibanabanang motimbang og 400 gramos ug mobalor og P2,720,000 ubos sa Dangerous Drug Board (DDB) value.
Matod ni Police Colonel Clarito Baja, direktor sa LCPO, nga si Racaza gitumbok nga high value target sa kapulisan sa dakbayan gumikan kay kanunay kini maghulganan og mga ilegal nga drugas sa Lapu-Lapu gikan sa dakbayan sa Sugbo.
Giingong taudtaod na kining gipanid-an isip naa sa listahan sa kapulisan apan maglisod sila sa pagsikop sanglit dili kini magdugay sa dakbayan.
Sa pagkakaron, ila pang gisusi kon kinsa pa ang mga kontak ni Racaza sa dakbayan lakip na usab og kinsa ang nagpaluyo sa illegal nga pagpayuhot niini sa drugas.
“Mao ni atong gipangita karon kay igmat na pud kaayo ni sila..," matod ni Baja.
Human sa pagkasikop ni Racaza, dali usab dayon nga nipahigayon og follow-up operation ang kapulisan sa LCPO nianang pagka alas 12:30 sa kaadlawon sa Disyembre 15 nga miresulta sa pagkasikop sa laing mga suspek nga sila si Jomar Torres Aringino alyas Tomay ug Marlon Lloyd Angeles Caña alyas Biboy.
Si Aringino giingong taga dan P. Del Rosario, Sambag 2 ug si Caña, taga dan V. Rama, Calamba, dakbayan sa Sugbo.
Nakuhaan ang duha og duha ka putos sa shabu nga motimbang og 10 gramos ug mobalor og P68 mil sa ikaduhang operasyon.
Ang kapulisan nihimo og dugang pagpaniid subay sa 'gikanta' sa dinakpan. (GCM)