DUHA ka mga sanga sa La Esperanza Foot and Body Massage sa dakbayan sa Sugbo ang gironda sa Women and Children Protection Desk (WCPD) sa Cebu City Police Office (CCPO) niadtong Sabado sa gabii, Disyembre 14, tungod sa giingong 'exra service.'
Si Police Lieutenant Erlinda Mayam, hepe sa WCPD-CCPO, nagkanayon nga nakadawat sila og reklamo gikan sa concerned citizen ug ilang gihimo ang pagpaniid sa wala pa gilusad ang ronda.
Unang gironda ubos sa pagpangulo ni Mayam mao ang sanga sa dan F. Ramos, Barangay Santa Cruz, alas 8:15 sa gabii diin ilang naluwas ang pito ka mga babaye nga pulos legal na ang pangidaron.
Sa pagka alas 8:20 sa gabii sa samang adlaw, gisulod usab sa laing team sa WCPD-CCPO ang sanga niini sa M.J. Cuenco Avenue, Barangay Mabolo ug naluwas usab ang unom ka mga babaye.
Uban sa pagronda sa kapulisan ang mga personnel sa Department of Social Welfare and Development (DSWD) 7 ug Special Weapons and Tactics (Swat).
Sa sanga sa Ramos, lakip sa gidala sa awtoridad mao ang manedyer o nagdumala sa masahian nga si Maria Nicole Dela Cruz Albarico, 37, taga Barangay Kalunasan.
Samtang sa M.J. Cuenco nga sanga mao si Marlene Moneba Saceda, 60, biyuda, nga taga Barangay Maribago, siyudad sa Lapu-Lapu.
Matod ni Mayam, nakadawat sila og report nga ang maong duha ka massage parlors nga gihimong prostitution den diin ang mga kustomer tanyagan og extra service sama sa pagilok o pagpaduwa sa kinatawo.
Human madawat ang impormasyon, nilusad dayon sila og 'case build-up' aron ma-validate kon unsa ka tinuod ang kasayuran nga nakuha.
Usa sa mga naluwas nga biktima, matod ni Mayam, niasoy nga ang matag kustomer kon gusto og extra service mobayad kinig P500 o pataas nga mag-depende na sa sabot bugti sa lawasnon nga kalipay.
“Ang ilang paagi didto sa sulod naa silay transaction nga extra service, base sa report nag-conduct gyud mig case build up ani aron ma-validate namo kung tinuod ba ang information,” matod ni Mayam.
Dugang niya, dili na mga menor de edad ang na-rescue nga mga babaye ug sagad 20 anyos na ug pataas.
Hinuon, dason ni Mayam, ang DSWD 7 ug kapulisan mo-double check pa kini nga kasayoran.
Ang WCPD nagpasulod og usa ka pulis nga nagpatuo nga kustomer ug sa dihang naa na siya sa lawak nga didto himuon ang foot and body massage, gihaylo dayon kini sa extra service.
Sa dihang nagkasinabot ug natunol ang kwarta nga P1,200, nihatag dayon kinig sinyas sa iyang mga kauban sa gawas ug dinhi na gisulod sa mga operatiba ang maong massage parlor.
Kalapasan sa Republic Act 9208 (Anti-Trafficking in Persons) as amended by RA 10364 (Expanded Anti-Trafficking in Persons) ang atubangon nga kaso sa duha ka mga dinakpan samtang ang mga na-rescue ipaubos pa nila sa imbestigasyon uban sa DSWD 7.
“Serve ni as warning sa mga ubang spa nagbutang silag post bitaw nga no extra service pero naa diay gihapon mao ning warning ni namo kay padayon gihapon ang among campaign against prostitution," matod ni Mayam.
Nahinabi na hinuon sa kapulisan ang tag-iya sa duha ka massage parlor apan giingong mihimakak ni nga nasayod siya nga adunay illegal nga binuhatan ang iyang mga masahista ug nagdumala niini. (B)