MAKATULO pa gihapon ang luha sa usa ka batan-on nga boksingero kung balikan ang kahimtang niini kaniadto sa dihang wala pa niapil sa boxing.
Gibutyag ni Carlo Paalam, 21, nga taga Upper Carmen, ning siyudad sa Cagayan de Oro, nga grabe ang ilang kahimtang kaniadto sa wala pa nagboksingero.
"Wala lage pernamente nga address lage. Siyempre, wala mi balay. Sauna pobre gyud kaayo mi. Nagpuyo mi og tangkalan sa baboy, mamasura pako tuyok-tuyok diri sa Cagayan, makakwarta lang, makapalit og pagkaon sa akong pamilya," ang emosyonal nga pahayag ni Paalam.
Nasayran nga nagsugod si Paalam sa dihang nag-edad pa og 10-anyos pa kinsa usa sa mga produkto sa amateur boxing development program ni Moreno ubos na usab sa giya sa iyang coach nga si Elmer Pamisa.
"I remember when we started in December of 2004 from ground zero, and now 15 years after we have Carlo Paalam, SEA (Southeast Asian) Games champion," pahayag ni Moreno.
Gidugang pa ni Moreno nga dili masukod ang kalipay niini ug hagit kini sa ubang mga kabatan-onan sa siyudad.
"This is also very inspiring not only for us, but also for the young boys here in Cagayan de Oro. He went through all of those challenges and obstacles and now he's champion, continue to be patient, determined and committed. Mao man gyud na what I'm telling them," dugang pa.
Nasayran nga na-dismissed si Moreno tungod niini nga programa human nga gireklamo kalabot na niini ug hangyo niini sa mga boxer nga maningkamot.
Nasayran nga una na nga gibutyag ni Paalam nga inspiration niini ang pamilya ug gani mao kini ang nagsuporta sa iyang mga igsoon diha sa pagpa-eskwela. Inspirasiyon ug idolo usab ni Paalam si Manny Pacquiao ug pangandoy usab nga makasulod sa Olympic game.
Kahinumdoman nga naangkon ni Paalam ang gold medal human sa iskor nga 5-0 unanimous decision batok sa Indonesian boxer nga si Kornelis Langu.
Gasa sa pamilya
Dakong gasa alang sa inahan ug sa iyang pamilya si Carlo Paalam tungod na usab kay wala'y puas ang suporta niini ug maoy nakahaw-as sa ilang kalisod.
Gibutyag sa inahan nga si Jocelyn Paalam nga si Carlo ang ikalima sa walo ka mga anak niini ug maoy nagsilbing breadwinner sa pamilya.
"Gasa gyud kaayo na siya sa Ginoo sa akoa kay bisan og pobre kaayo mi, pero siya gyud nakahawa sa among kalisod bisan sa pagkaon galisod mi sauna. Pero sugod nga nakasulod siya sa Philippine team, nakapamalit mi, nakapamalit mi og balay ug yuta tungod sa iyaha. Dako gyud kaayo siyang gasa,"emosyonal nga pahayag sa inahan.
Gidugang pa niini nga lambing ug buotan nga anak si Carlo gani malooy-on ug matinabangon.
"Buotan kaayo, lambing kaayo, mama's boy dayon humble gyud na kaayo siya. Mapaubsanon kaayo unya matinabangon, malooy-on ug dili na siya gapabadlong nga bata. Siya ga-advise sa iyang mga manghod, mga mahulang bisan ako gapaminaw ko sa iya," dugang pa.
Malipayon ug wala magdahom si Paalam sa mainitong pagtagbo kaniya sa dihang nibalik sa dakbayan.