ANDAM mo-atbang si kanhi Misamis Oriental First District Congressman kasamtangang Gingoog City Vice Mayor Peter Unabia sa papapili pagkagobernador sa lalawigan sa Misamis Oriental sa tuig 2022.
Kini ang iyang deklarasyon niadtong adlawng Huwebes, Disyembre 12, dihang gihinabi sa pipila ka sakop sa prensa human sa State of the City Address ni Gingoog City Mayor Erick Cañosa.
Niaging mga adlaw, nagdeklarar si Cagayan de Oro City Mayor Oscar Moreno nga iyang gikonsiderang magpapili og balik pagka-gobernador sa Misamis Oriental labina katapusang termino na niini isip mayor butang nga nakahatag reaksyon si Unabia ug mihatag ug gibug-aton sa susamang posisyon.
Si Moreno ug Unabia pulos ana ubos sa partido PDP Laban apan matud ni Unabia nga dili kini ang basihan.
"Mao na ang giingon nga kung makapili kag kauban di ka makapili'g kontra, dako og tsansa nga magkontra. Kay like in my 2010 election, kaatbang mi. Iyang igsuon akong kaatbang, siya governor," matud ni Unabia.
Miingon sab niini nga ang pagpapili pagka-gobernador gihatagan gyud niya karon ug dakong gibug-aton.
"Kung inyo pangutana mag governor ba ko...sa among alyansa ni Governor Bambi ako ang ilang gi-push. Honestly, naa'y lugar gihatagan nako ug gibug-aton kung timbangon modagan but kinahanglan i-discuss," dugang niini.
Gibutyag sab ni Unabia nga layo pa kaayo ang eleksyon ug karon isip bise mayor sa Gingoog usa na gihapon ka matang sa pulitikanhong kalihokan ang iyang mga gihimo.
"Honestly, layo pa kaayo ang eleksyon para sa ako sa everyday nga lihok as vice mayor before congressman. Para sa ako, pulitika naman na," matud ni Unabia ug dunay gipaabot nga mensahe alang kang Moreno.
"Imo manang katungod nga modagan so dagan!" sulti ni Unabia ug sa pangutana kung unsa kini ka andam sa umalabot eleksyon.
"Ready na kaayo!" tubag niini.
Magpwersa
Buot sab ni Unabia nga makigsabot sa iyang mga kaalyado sama nila ni Governor Bambi Emano ug kanhi nagpapili pagkamayor Pompee La Viña kung unsay angayan alang sa siyudad sa Cagayan de Oro.
Kini tungod iyang nalantaw nga kung kaalyado ang mamuno sa siyudad giingong ma-align ang mga programa ug paspas ang kalamboan sa lalawigan ug siyudad.
"Honestly, ang Misor ug CDO dapat isa ang plano maglingkod ang province and city. For CDO to grow, kinahanglan align ang programs sa city and province then gikinahanglan kaayo sa province ang growth sa city," dugang niini.
Gibutyag sab niini nga pilion pa kinsa nila ni Governor Bambi ug Pompee La Viña ang magpapapili pagka-mayor sa siyudad.
"Wala pa sa city. It's either Bambi or Pompee," matud ni Unabia.