KATULO-ON ni Mayor Edgardo Labella ang kantidad sa incentives nga madawat sa Sugbuanong mga atleta, kinsa nakahakot og mga medalya atol sa 2019 Southeast Asian Games sa kaulohan.
Ang Cebu City adunay ordinansa nga gipanday ni Konsehal Jerry Guardo niadtong tuig 2017 para maoy basehan sa paghatag og incentives para sa mga Cebu City athletes nga makahakot og pasidungog sa mga international tournament sama as SEA Games.
Apan si Mayor Labella niingon nga angay pun-an ang P100,000 (gold) P50,000 (silver) ug P25,000 (bronze) sanglit dili tiaw ang garbo nga gidala sa mga atleta gikan sa Cebu.
“Sa akong tan-aw, murag kuwang (pa ang incentives) so we will look for another source para atong mahatag ang atong saad nga P300K, P200K ug P100K for gold, silver and bronze. We will find a way kay naa may daghang motabang and ako sad tan-awon ang uban alignment sa atong budget para atong madugangan,” padayag ni Labella.
“It is just fitting and proper that they have brought owner and glory not only to the country but more particularly to the City of Cebu kay ang mga contingent gikan man sa Cebu City and more important thing, they set the tone because the first 10 golds nga nakuha sa Pilipinas particularly sa atong Dance sports competitor,” dugang sa mayor.
Si Labella niingon nga si Mary Joy Tabal niadtong tuig 2017 (siya ang nakakuha sa gold medal didto sa Malaysia), gihatagan siya kaniadto ni kanhi Mayor Tomas Osmeña og P500,000 sanglit nihit pa kaniadto ang bulawang medalya para sa Philippine Team hinungdan nga iya sab gipasakaan ang ilang insentibo.
“Its a great honor, dako kaayo nato nga dungog at the same time to serve an encouragement and incentives sa atong mga athletes, young sports lovers that we can be the best if only properly harness and properly trained,” batbat ni Labella.
Gawas sa mga atleta, ang ilang tagsatagsa ka mga coach aduna say bahin sa incentives nga gidugang sa mayor sanglit iyang gihulagway ang kamahinungdanon sa gihuptan nga papel sa mga coach para maba-id ang abilidad sa mga atleta.
Apan iyang gipadayag nga ang Cebu City Sports Commission pinangulohan ni Executive Director Edward Hayco ang mohimo sa guidelines kon pila ang percentage nga ihatag sa mga coach.
skate park ipadayon
Gumikan sa hangyo ni Margelyn Didal, ang gold medalist sa skateboarding, ipadayon ni Labella ang pagtukod sa skatepark sa dakbayan.
Apan iyang gipadayag nga dili na niya paninglan si Osmeña sa giingong US$100,000 nga donasyon para sa maong proyekto ug pangitaan lang kini niya og pundo.
Iyang gitahasan si Konsehal Dondon Hontiveros sa pagpangita og lugar gawas sa Plaza Independencia sanglit dili kini haom para sa skate park. Ang skate park nga pagatukoron ni Labella gastuhan sa siyudad og di mominos P15 milyones nga haom para usab sa mga kompetisyon. (PAC)