Sugilanon: Gaba sa Pasko

Sugilanon: Gaba sa Pasko

HAPIT na usab ang Pasko, Langga. Pipila ka adlaw na lang Pasko na,” ni Alex kang Tata nga iyang asawa.

“Ngano man diay og duol na ang Pasko?”

“Mamakasyon na pod tas probinsiya aron makalikay tas mga kinugos. Kusog ra ba kaayo na silang mangayog pinaskuhan.”

“Ha? Na sab? Ay, ato lang god silang hatagan, Langga,” ni Tata. “Bisag ginagmay lang god.”

“Unsa man tawoy atong ihatag nga wala man tay kuwarta? Hibawo ka bitawng daghan tag giutang nga aplayanses,” insister ni Alex.

“Aw, ikaw god, mao man kaha,” paundayon ni Tata.

“Sige, pangandam na. Ilisi ang mga bata. Pagda lang og pipila ka ilisan kay usa ka semana ra man ta sa probinsya.”

Ingon niini ang naandan sa magtiayong Alex ug Tata sa barangay Guba. Duha ka Pasko na nila kining gibuhat ug karon ang ikatulo. Mamakasyon sila uban sa duha nila ka anak sa lungsod sa Santa Rosa kon mag-angat na ang Pasko aron paglikay sa mga kinugos ug linudhan sa kasal nga mangayog pinaskuhan. Daghan man god kaayo silag kinugos sa bunyag ug linudhan sa kasal. Gawas niana, naa poy ubang pag-umangkon nga mamarayeg nilag regalo matag Disyembre 25, wa pay labot sa mga mananaygon.

Nag-alagad si Alex sa usa ka kompaniya sa harina sa siyudad ug igo-igo ra ang iyang suweldo. Hinuon, naay bonus sa Pasko apan igo ra pod nilang gamiton sa pagpamalit og bag-ong sapot sa iyang mga anak ug nilang magtiayon. Ang uban ipamalit nilag pangandam sa Noche Buena. Apan wala na kini karon kay mamiya man lagi sila sa ilang balay paglikay nga makahatag og pinaskuhan.

“Asa man diay ta, Ma?” sukot ni Isolde, ang siyete anyos nga panganay nilang anak, dihang giilisan ni Tata uban sa singko anyos niining manghod nga si Pepet.

“Mangadto tas ilang Tiya Wela ninyo sa Santa Rosa. Mamakasyon na pod ta kay Pasko na man,” pasabot sa inahan.

“Nganong adto man ta didto mamasko, Ma? Dinhi na lang tas ato, uy!”

“Mao may pagbuot sa imong amahan, Inday. Gusto bitaw unta kong anhi na lang ta mag-Noche Buena apan di man gyud siya mosugot.”

Tuod man, nahiabot gyud ang pamilya ni Alex sa Santa Rosa. Didto nila sugata ang bisperas sa gabii sa Pasko uban sa banay ni Wela nga iyang manghod. Mingaw kaayo nilang gitagbo ang Pasko, kay sukwahi sa siyudad, wala may buto-buto. Hinuon, naay panagsang tingog sa turutot ug pakang sa lata nga milanog sa palibot.

Nianang pagkaliwas sa Pasko nakahukom na silang mamauli sa ilang balay sa barangay Guba. Human makapamutos, nananghid dayon sila kang Wela ug sa iyang kapikas nga si Boy.

Apan sa ilang pag-abot sa barangay Guba nakurat sila pagkamatikod nga abli na ang pultahan sa ilang balay. Nahiugbok si Alex ug nakapanglingo-lingo samtang si Tata mikulisiw ug gisukmatan ang bana pagkakita nga wala na diha ang inutang nilang bag-ong telebisyon ug ubang mahalong butang. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph