PUWERTENG sabaa sa audience dihang usa-usa nang ni-perform sa stage ang cast sa MMFF movie entry “The Mall, The Merrier” niadtong Dominggo sa sayong gabii sa SM City Cebu covered parking.
Unang niabot sa venue silang Elise Joson, Jameson Blake ug Tony Labrusca sakay sa puting van. Pagkataudtaud nisunod ang laing van nga maoy gisakyan nilang Vice Ganda ug Ion Perez.
Niabot sila sa Cebu nianang pagkahapon ug pagkahuman sa show mga alas 6 sa gabii balik dayon sila sa Manila. Tag-usa ra sila ka kanta kadiyot ra kaayo.
Apan di lang ako kundi ubay-ubay ang nakabantay nga dili kaayo daghan ang nanan-aw karon sa mall show ni Vice kumparar sa miaging tuig didto sa SM Seaside.
Busy lang kaha sa Christmas shopping ang mga tawo o nahadlok matanggong sa traffic?
Adto ni makita ang katag inig showing na sa tanang mga entry sa Metro Manila Film Festival karong Dec. 25. Dinhi nato mahibaw-an kon wa ba mobahar ang pagka-unkabogabol phenomenal star ni Vice.
Bisan pa og silay mag-No. 1 pero makita man na sa gross receipts kon nitaas ba o niubos?
The Clash
Si Jeremiah Tiangco gyud ang nidaug nga grand champion sa singing competition nga “The Clash” Season 2 sa GMA-7 niadtong Dominggo.
Mao say akong bet. Nindot kaayo ni siya iparis sa Cebuanang si Golden Canedo (The Clash season 1 grand champion).
Di ba duna may bag-ong Sunday variety show ang GMA-7 nga mag-premiere sa Enero 5, 2020? Maorag “#AyOS” man tingali ang taytul. Mao kuno ni bag-ong makaatbang sa ASAP sa ABS-CBN.
Kon mahatagan lang og saktong exposure ug saktong materyal kining mga bag-ong talent karon sa Kapuso, kombati kaayo.
Pakunswelo?
Wa lagi si James Reid ug Nadine Lustre sa “Family is Forever Christmas special” sa ABS-CBN? Sa tanang loveteams nga ni-perform sila ray wala.
How true nga kanang pag-judge ni Nadine sa “Your Moment” pakunsuwelo ra na sa ABS-CBN aron di siya magmukhang kawawa?