HAPIT na gayod ang Pasko. Sa mga Katoliko, nagsugod Lunes, Disyembre 16, ang siyam ka adlaw nga tradisyonal nga Misa de Gallo o novena nga matapos sa gabii sa Disyembre 24.
Panahon kini sa paghinatagay, pag-inambitay, og pagpinasayloay sa mga bikil sa niaging tuig. Kini ang pinakamalipayon nga kasaulogan sa mga Kristiyanos nga mao ang pagkatawo sa Manunubos.
Nindot paminawon ang wali o sermon sa kaparian karong panahona kay naghisgot kini og gugma, paghatag sa kaugalingon sa uban ug pag-usab sa dautang kinaiya ug dili na magpabadlong.
Apan unsa kahay mahitabo kung ang mga tighatag og wali ang nagpabadlong? Karong bag-o lang, gibalita nga nagpagawas kuno og mando ang obispo sa Diocese of Tagum sa pagsuspende o pagtangtang sa 26 ka pari sa ilang katungdanan sa simbahan.
Niingon ko nga “kuno” kay basin “fake news” na sab ni nga hinimuan sa mga bunguton nga walay mahimo sa ilang kinabuhi. Uban daw kanila, gitangtang sa pwesto tungod sa pagbaliwala sa ilang panaad nga “celibacy” o ang dili pagminyo ug pagbaton og karelasyong sekswal.
Ang pipila daw kay may anak, samtang ang uban gisuspende sa wala pagtuman sa ilang trabaho, wala na mahisubay sa pagtulon-an sa simbahan ang ilang gibuhat o ginatudlo og uban pang rason.
Kung tinuod man kini, karon ra ako nakadungog og ingon niini kadaghan nga gipalagpot o gisuspende nga pari sa usa lang ka higayon sa kasaysayan sa simbahan sa Pilipinas. Nakadayeg ako sa maong obispo sa iyang kaisog nga ibutyag ug pag-aksyon sa salawayong binuhatan sa iyang sakop.
Mao kini ang gisaway sa ubang relihiyusong sekta sa simbahang Katoliko nga tabunan lamang ang sala sa ilang sakop. Imbis nga salang kriminal, mahimo na lang hinuon nga “clerical error” ang ilang nabuhat og ibalhin sila sa laing parokya o kaha ipadala sa Roma aron moeskwela.
Ang uban nangahimo pang obispo o ipadala sa misyon sa laing nasud og didto na sab maghasik og lagim. Sa akong nahibal-an, dako ang nagasto sa Vatican kaniadto sa mga kaso nga gikalambigitan sa pipila ka pari ug obispo.
Ang uban gigamit sa pagbayad sa sustento sa ilang pamilya, pagtungha sa anak, pagsuburno sa testigo aron mohilom, ug uban pa. Ubos ni Pope Francis, ang mga ingon niining binuhatan, iya nang gisaway ug giaksyunan busa mabasa na nato nga dunay natanggal nga dagkong opisyal sa simbahan ug ang uban gipriso pa.
Kining gibuhat sa obispo sa Tagum kung tinuod man, sugod kaha sa paglimpyo sa simbahan sa mga pasaway nga opisyal niini? Kung madayon man, seguradong adunay krisis sa pari sa nasud. Kulangon na unya kitag pari nga mosaulog sa misa sa simbahan.
Panahon na kaha nga pwede nang momisa pag-usab ang mga “married priests” nga naghulat lamang sa pagtugot sa simbahan aron makabalik sa pwesto? Ubay-ubay baya ang mga minyong pari nga nagpahipi lang sa daplin ug naminaw sa panghitabo sa palibot kay dili ra ba hugot kaayo sa simbahan sa ilang palisiya sa minyong pari. Kahibalo kita nga adunay sekta ubos Romano Katoliko nga gidumalahan sa mga minyong pari.