KIDAPAWAN CITY -- Nanagan og balik ngadto sa mga evacuation sites sa probinsiya sa North Cotabato ang mga kanhi gilinog niadtong Oktubre, sa diha nga subling gitay-og og 6.9 magnitude nga linog alas 2:11 sa hapon, Dominggo, Disyembre 15.
Dunay mga bakwit ang anam-anam na untang nanguli sa ilang mga panimalay sa mga lungsod sa Makilala, M’lang, Tulunan, Magpet, ug dakbayan sa Kidapawan. Apan sa diha nga nilinog niadtong Dominggo, namalik na sab ang mga pamilya sa mga evacuation centers.
Samtang nanggawas ang mga pasyente sa mga balay tambalanan ug malls sa dihang nitay-og ang linog kon diin ang epicenter nasubay didto sa Padada, Davao del Sur.
Duna say mga balay nga giayo na apan nahugmak og balik sa linog niadtong Dominggo. Samtang duna say gitahong mga pagdahili sa yuta.
Niabot og intensity six ang nasinatian sa mga lugar sa North Cotabato.
Samtang duna say gitaho nga pagkaguba sa mga balay ug gambalay sa gobyerno didto sa Maguindanao Province sa pinaulahing nahitabong linog.
Kahadlok ug trauma ang gibati sa mga bakwit nga naka-move on na unta apan subling nalisang.
Hangtud sa pagsuwat ning balita, nakasinati pa og mga aftershocks ang probinsiya ug mga kasikbit nga lugar. (Edgar E. Fuerzas)