MAS maayong igmat, mabinantayon, ug aktibo ang mga Barangay Disaster Risk Reduction Management Council (BDRRMC) sa matag area of responsibility (AOR) sa tanang dapit sa Davao Region, luyo sa sunod-sunod nga mga aftershocks dala sa 6.9 magnitude nga linog nga miigo sa probinsiya sa Davao del Sur ug sa ubang dapit sa Mindanao.
Adlaw’ng Lunes, Disyembre 16, ang Department of the Interior and Local Government (DILG)-Davao Region mipagula og usa ka memorandum aron sa pag-aktibo sa BDRRMC sa matag AOR.
“Please ensure the activation of the BDRRMCs in your jurisdiction and also to establish a proper coordination protocols with their respective municipal risk reduction management council counterparts,” tipik sa pamahayag.
Sumala ni DILG-Davao director Alex Roldan nga sugod alas tres sa hapon,Lunes, Disyembre 16, gi-aktibo na ang BDRRMC aron sa pag-monitor sa kahimtang sa palibot luyo sa sunod-sunod nga mga aftershocks.
Sa kasamtangan ang Davao Region nakasinati og mga aftershocks diin maoy gikalisang og samot sa mga tawo.
“Halos dili nami katulog, kita, kay malisang naman ta aning sige nalang og aftershocks, mag-amping ug magbantay lang gyud ta sa palibot,” ingon ni Maricel Tampus, 38-anyos taga, Brgy. 31-D, Roxas Extension, Davao City.
Kahinumdoman nga atol sa linog niadtong Dominggo sa hapon, nasinati sa Davao City ang intensity five nga maoy hinungdan sa pag-trending sa mga video nga gipang-post sa mga netizens, ang pagpangbuto sa mga kable sa kuryente sa kanto Acacia sa Davao City.
Sa usa sab ka sikat nga mall sa Jose P. Laurel Avenue, Bajada, makalilisang sab ang pagbuto sa kable sa kuryente gawas sa ilang gambalay nga maoy nakapadagan sa mga mall-goers alas 2:12 sa hapon, Dominggo.
Nagpadayon sab ang retrieval operations sa mga rescuers sa mga patay ug angol nga nahugmakan og mga gambalay sa Padada Davao del Sur diin maoy duol sa epicenter sa linog.
Sa Davao City, padayon ang City Engineers Office sa pagpahigayon og assessment kung angay ba kining balikan ug kung isyuhan ba kini og notice of condemnation ang mga gambalay ning siyudad.
Sa pinakaulahing taho nga gipahibalo sa Office of the Civil Defense, anaa na sa 179 ka mga aftershocks ang natala gikan alas sais sa gabii sa adlaw’ng Dominggo. (Jeepy P. Compio)