KAPIN na usab sa usa ka kilo nga shabu ang nasakmit sa Carbon Police Station atol sa buy-bust operation sa Crystal Compound sa V. Rama avenue, Barangay Guadalupe, dakbayan sa Sugbo niadtong Sabado, Disyembre 8, pasado alas 10:00 sa gabii.
Gibanabana sa kapulisan nga moabot sa P7,480,000.00 ang kantidad sa ilegal nga drugas nga nasakmit gikan ni Addreaainne Lester Adlawan Mendez, 28, alyas Ter, minyo ug molupyo sa naasoy nga dapit.
Apan ang suspek nipiyait nga gipun-an ang nakuhang drugas gikan kaniya atol sa buy-bust.
Giangkon ni Mendez nga namaligya siya og ilegal nga drugas apan natingala siya nganong naabot og kapin usa ka kilo ang nakuha sa mga pulis gikan kaniya.
“Ako man daw... ako na lang na angkunon. Pero di kaabot usa ka kilo uy,” matod ni Mendez sa Superbalita Cebu.
Dugang niya, buot na unta siya nga moundang ilabi na nga subsob na ang kampanya sa kapulisan batok sa ilegal nga drugas, apan tungod sa kalisud, nagpadayon siya sa maong negosyo.
Operasyon
Si Chief Insp. John Kareen Escober, hepe sa Carbon Police Station, maoy nangulo sa malampusong operasyon.
Gibutyag ni Escober sa Superbalita Cebu nga duha ka semana nilang gipanid-an ang suspek human nilutaw ang iyang pangalan sa mga nadakpan sa ilang station nga didto sila magkuhaan og supply sa drugas ni Mendez.
Tungod niini, nakig-alayon sila sa Guadalupe Police Station aron molusad sa buy-bust operation.
“Katong mga ginagmayng dakop nato diri sa Carbon permi siya manganlan nga sa iyaha gikan ang supply mao to nag-surveillance mi hangtod nga nag-positive among information,” matod ni Escober.
Suborno
Ug pagka alas 2:50 sa kaadlawon, kagahapon, Disyembre 9, gisuwayan sa pagsuborno ang mga pulis sa Carbon aron buhian si Mendez bugti sa kantidad nga P50,000 sa nagpailang hinigugma niini.
Giila ang maong babaye nga si Fern Serion, 24, nga taga dan Urgello, Barangay Sambag 2, siyudad sa Sugbo.
Samtang, si Mendez niangkon nga iyang uyab ang suway nga nisuborno sa mga pulis, apan wala siya masayod asa kini gikan og kwarta.
Nagdumili na hinuon pag luwat sa iyang pamahayag si Serion ug didto na lang niya matod pa atubangon sa korte ang pasangil.
Adunay gitug-an nga pangalan si Mendez nga maoy nag-supply niya og shabu apan, matod ni Escober, nga ila pa kining subayon kon nagtug-an ba kini sa tinuod.
Si Sr. Supt. Royina Garma, direktor sa Cebu City Police Office (CCPO), nagkanayon nga matag lusad nila sa anti-drug operation kasagaran sa ilang mga madakpan naa sa sulod sa bilanggoan ang giingong middle man pinaagi sa pagtawag lang sa telepono.
Matod niya aduna na silay gihimo nga lakang uban sa mga sakop sa Bureau of Jail Management and Penology (BJMP) 7 aron mapakgang ang padayon nga ilegal nga negosyo sa mga binilanggo nga adunay mga kaso sa ilegal nga drugas.