Namaligya og Christmas lights nga walay ICC gisilutan

PITO ka mga establisyemento sa Sugbo ang gipamulta sa Department of Trade and Industry (DTI) 7 tungod kay naninda kini og Christmas Lights nga walay Philippine Standard Quality o Safety Mark ug Import Commodity Clearance (ICC).

Ang maong mga establisyemento anaa kini sa dakbayan Mandaue, Sugbo, ug Danao.

Matod ni Ines Cajegas ang Chief of the Consumer Protection Division wq DTI-Cebu nga sa 78 ka establisyemento nga nabisita nila, anaa lang sa 7 ang non-compliant niining PS ug ICC product quality marks.

Gisakmit nila ang maong mga Christmas lights nga nagkantidad og P340,101.

Dugang ni Cajegas nga nangayo na sila og rekomendasyon sa Department of Environment and Natural Resources (DENR) kon unsa nga kompaniya ang mamahimo moguba ug mosunod sa maong mga Christmas lights.

Tungod kay nitunga ang maong mga establisyemento sa pre-adjudication conference sa DTI, imbes nga P25,000 ang multa niini, anaa nalang kini sa P21,250 matag establisyemento,

“Sa tanang establisyemento nga namaligya ug gusto pa mamaligya og Christmas lights, you continue to be compliant,” si Cajegas nagkanayon.

Gipasabot usab ni Cajegas nga mahinungdanon kining PS ug ICC mark tungod kay nagpamatuod kini nga niagi sa quality check ang maong Christmas lights ug aduna kini’y igong permit nga nahasubay sa quality guidelines sa kaluwasan sa gamit.

Nagsugod ang DTI 7 sa pagmonitor sa mga Christmas lights niadtong buwan sa Nobiyembre. (HBL)