KARON nga holiday season, daghan ang gusto nga magdali o kaha tungod kay sakay ug daghang bitbit, daghan ang mas gusto mosakay og taxi.
Ang Land Transportation Franchising and Regulatory Board (LTFRB) 7 nipahimangno sa tanang driver dili lang sa taxi apan sa pampubliko nga sakyanan nga dili himuon kining mag-isnab og pasahero karon nga panahon sa holiday season nga tingsakay.
“For our riding public, kinahanglan aware mo nga dunay LTFRB nga nagatan-aw ayaw mo kahadlok og sumbong diri sa amoa kay kana tanan ninyong sumbong sa amoa, kay kanang tanan ninyong sumbong hilabi ning Oplan Isnabero, atoa ning hatagan og aksyon,” matod ni LTFRB 7 regional director Eduardo Montealto Jr.
Dugang ni Montealto nga kuhaan nila og habig ang reklamante ug ang driver sa maong pampubliko nga sakyanan.
“Kini atong mananakay kinahanghlan alert gyud sila nga basta naay mga ingon ana nga systema, isumbong diri sa amoa,” si Montealto nagkanayon.
Kon mapamatud-an nga nakalapas ang driver, pamultahon kini og P5,000, “Duna na sila’y penalty nga P5,000 sa first offense, niya kung sa tan-aw sa among database kung ikaduha nana sila so times two, P10,000. Sa ikatulo ana kay among i-suspend for 30 days plus P15,000.”
Kon nagbalik-balik na kini nga reklamo, bawian sa prangkisa ang operator sa maong taxi.
“Kanang mga pakyaw-pakyaw kulorom na siya, ang multa ana kay P120,000,” si Montealto nagkanayon.
Usa sa himuon sa LTFRB ang pagkuha sa footage sa dashcam sa maong sakyanan aron mapamatud-an ang gihimo nga pag-isnab sa pasahero.
Dugang ni Montealto nga daghan na ang ilahang nadakpan niini apan dili siya makahatag sa insakto nga gidaghanon niini. (HBL)