WALA gikalimod sa Department of Health (DOH) 7 kining kakuwang sa nurses dili lang sa private hospitals apan lakip ning mga tambalanan nga gidumala sa local government units (LGUs) ug sa national government.
Si DOH 7 regional director Dr. Jaime Bernadas nagkanayon nga tungod kay mas dako ang suholan sa mga tambalanan nga gidumala sa national government, mas daghang nurse ang gusto makatrabaho sa maong mga tambalanan.
Dugang ni Bernadas nga wala’y kalahian ang sitwasyon sa pribado nga tambalanan sa mga pampubliko nga tambalanan kabahin sa problema sa nurses.
Tungod usab kay dili tanang nurses makasulod sa national government hospitals, mas pilion niini ang motrabaho abroad susama sa Estados Unidos ug Europe tungod kay mas dako ang suholan.
Kon ikomparar ang suholan sa national government hospitals ug sa LGU hospitals, anaa sa P31,000 ang Nurse 1, P35,000-P38,000 usab ang Nurse 2 ang suholan sa national government hospitals.
Samtang anaa sa P16,000-P18,000 alang sa Nurse 1 ug P20,000 ang Nurse 2 sa LGU hospitals. Anaa ra sa susamang salary range ang private hospital nurses.
Matod ni Bernadas nga niadto pang tuig 2018 nahuman ang 4th tranche sa Salary Standardization Law 2015 alang sa nurses.
Samtang kining bag-ong gipasar nga P3.1 bilyon sa Senado, alang kini sa 2020, wala pa hingpit makadawat og formal notice ang regional office kabahin niini.
Si Bernadas niingon nga ang role sa regulation sa DOH sa pribado nga ospital anaa sa kakuwang sa personnel. (HBL)