IMBES nga mag-Christmas party, gipaubos sa usa kasurprise drug test ang tanang sakop sa fire volunteers sa dakbayan sa Sugbo niadtong Biyernes, Disyembre 13.
Si Capitol Site Barangay Councilor Kelly Quijada, pangulo sa tanang fire volunteers, maoy nihimo sa maong plano nga atol sa Christmas party himuon ang surprise drug test.
Ang buhatan sa Cebu Office for Substance Abuse Prevention (Cosap) maoy mipahigayon sa pag-drug test.
Matod ni Quijada nga bisan ang iyang mga sakop nga fire volunteers sa Barangay Capitol Site wala kahibalo sa maong plano.
Si Quijada ug ang officer-in-charge (OIC) sa City Disaster Risk Reduction Management Office (CDRRMO) Harold Alcontin mao lang ang nakahibalo sa maong plano.
Gipasabot ni Quijada kang Alcontin nga walay laing haum nga adlaw nga matapok niini ang tanang mga sakop sakop sa fire volunteers kundi ang christmas party nga gituohang anaa ang tanang mga miyembro.
Ang Christmas party gihimo sa Barangay Tinago Gym niadtong Biyernes sa buntag, Disyembre 13, 2019. Dinhi gipahibalo ni Quijada sa iyang mga sakop nga sugdan ang ilang party hangtud na sa udto tungod sa mga posibleng alarma sa hapon paingon na sa gabii.
Ug motumaw dili na unya sila makaapil sa ilang tinuig nga Christmas party.
Atol sa kalihukan gipaniguro ni Quijada nga anaa na sa sulod ang tanang sakop, ug diha na gipahibawo nga mag-drug test una sila sa di pa magsugod ang ilang party.
“Ako pa silang gitagaan og chance, usa ka minuto nga pwede pang mogawas sa gate ang dili mouyon sa drug test. Hinuon wala may niuli bisan usa,” mtod ni Quijada.
Sa 80 ka mga barangay sa Sugbo, 29 ka mga barangay ang dunay fire volunteers, diin 10 ka mga miyembro sa barangay fire volunteers nga sa kinatibuk-ang ihap moabot sa 290 ang miyembro.
Dugang ni Quijada nga dunay upat ka mga barangay ang wala motunga sa Christmas party apan kining upat ka mga barangay dili makalikay sa surprise drug test kay ipatawag gihapon ni Quijada ang 40 ka mga miyembro sa upat ka mga barangay nga wala motunga.
“Gipakuha na namo ang pangalan kon kinsa ning wala niadtong tungora aron ma eskidyul sila og drug test. Apan dili lang mahibal-an kon kanus-a ang sunod nga drug test,” matod ni Quijada.
Matod ni Quijada nga kon dunay magpositibo, awtomatiko nga matangtang sa serbisyo. (BBT)