SUPERBALITA CEBU

Palma: Maghiusa, maghigalaay kitang tanan

MITAMBONG: Mga opisyal ug kawani sa Cebu City nga gipangulohan nila ni Mayor Edgardo Labella (wala) ug Bise Mayor Michael Rama mingtambong sa unang Misa de Gallo nga gidumala ni Cebu Archbishop Jose Palma (tunga) sa merkado publiko sa Carbon. (Amper Campaña)

KAHIUSAHAN bisan sa managlahing mga pagtuo ug panaghigalaay kinahanglan ipatigbabaw panahon ning pagsaulog sa Pasko.

Mao kini ang unod sa wali ni Cebu Archbishop Jose Palma sa iyang unang Misa de Gallo nga gipahigayon sa Carbon Public Market sa Lunes sa kaadlawon, Disyembre 16, 2019.

Gidasig ni Palma ang katawhan nga magkahiusa ug hangupon ang tanan karong Pasko bisan sa nagkalain-lain nga mga rehiyon ug pagtuo.

“Ang punto kay ayaw pag critize sa lain rehiyon. Ikaduha, ayaw pag convert. Paghigalaay lang ba, fraternity and friendship. There are many things that unite, then things that divide. Ayaw pag-foster sa mga butang. Dapat mag unite. Many things that can transcend religion,” matod ni Palma.

Si Palma niingon nga iyang gipili ang Carbon Public Market nga misahan sa unang adllaw sa Misa de Gallo tungod kay importante kini nga bahin sa komonidad. “Para nako, it is going to start in here kay nakita man nako ang ilang pagtuo, labi na diri sa Carbon Public Market,” saysay niya.

Dugang ni Palma nga daghan usab sa mga mamaligyaay sa maong lugar nga gusto mosimba, apan di na kini makahigayon pa og tambong tungod na sa ka busy.

Sila si Cebu City Mayor Edgar Labella ug Vice Mayor Mike Rama nitambong usab sa misa kuyog ang mga empleyado sa city hall.

Matod ni Labella nga motambong siya og Misa de Gallo aron masuta ang kahilom ug kahapsay sa pagsaulog niini.

Sigon ni Carbon Police Station Chief Major Alvin Llamedo, anaa sa 500 ka mga tawo ningtambong sa misa.

Matod ni Llamedo nga bisan sa pagbunok sa uwan, ang 500 ka mga tawo nga gibana-banang nitambong sa misa wa matarog.

“Bisan nagbunok ang ulan, Sir, wala gyud sila mohawa. Malinawon ra kaayo ang Misa de Gallo,” matod ni Llamedo.

Way bisan usa ka insidente bisan nakalakaw na sila si Labella ug Rama.

Trapiko wa masikwate

Bisan kon dagsa ang manimbahay alang sa unang adlaw sa Misa de Gallo sa dakbayan sa Talisay, gihulagway sa kapulisan ug sa City of Talisay Traffic Operations Developmnent Authority (CT-TODA) nga malinawon kini.

Kini gawas lang sa mga mamaligyaay og puto ug sikwate gawas sa simbahan nga nakababag sa mga mamauliay nga manimbahay.

Human nga di lang mga pulis ang makita sa mga simbahan, kundi lakip na ang mga traffic enforcer, ug mga kawani sa Talisay City Disaster Risk Reduction and Management Office.

Gipangtutukan nila ang mga simbahan nga nahimutang daplin sa dan, sama sa Barangay Tabunok, Lawaan 1, Lagtang, San Isidro, Mohon, Poblacion, Cansojong, ug Laray.

Alas tres pa lang sa kaadlawon, gipakatap na sa walo ka dagkong mga simbahan nga nahimutang daplin sa dan ang ilang mga personnel.

Gitug-an ni Jonathan Tumulak, pangulo sa CT-TODA, nga gitugutan lang nila nga makapark daplin sa dan sa gawas sa mga simbahan ang ubang sakyanan nga di na maigo sa parking space sa compound sa simbahan.

Apan gisiguro usab nga di kini makamugna og trapiko ug hulga sa mga pedestrian.

Samtang usa sa ilang giawhag ang mga mamaligyaay og mga kakanin, sama sa puto ug sikwate, nga di sa exit sa compound sa simbahan mamaligya.

Kini aron di makamugna og paghuot sa mga manimbahay sa paggawas sa simbahan.

“Ato man gud na-observe ganiha nga naa sila diha na duol gyud sa gawsanan, matapok ang mga mopalit, makapahuot siya sa mga manimbahay nga mogawas. So, sugod ugma, (Dec. 17), ato sila isibog, ato i-control kay naka-obstruct na sad,” pasabot ni Tumulak.

Dugang ni Tumulak nga bisan kon wa gitugot ang mga manimbahay daplin sa dan, base sa kamanduan ni Presidente Rodrigo Duterte, apan nihatag sila karon og exemption kay pipila ka minutos human sa Misa de Gallo, mahawan ra man usab ang mga ambulant vendor.

Samtang wala ra usab natala ang Talisay City Police Office nga mga alarma, bisan na ginagmay nga mga kremin sama sa kuot o kawat.

Malinawon

Unang adlaw sa Misa de Gallo sa Central Visayas gihulagway sa Police Regional Office 7 nga malinawon.

Matod ni Police Brigadier General Valeriano de Leon, hepe sa PRO 7, nga nisuroy siya sa mga dapit sa Metro Cebu, lakip na sa lungsod sa Cordova.

Iyang nakita ang mga pulis nga hugot nga nagbantay sa simbahan.

Siya nimando nga magbutang og mga police assistance desk sa mga simbahan, pantalan ug ubang dapit nga adunay daghang mga tawo aron dali ra nga matubag kon dunay problema.

“Wala akong na receive na reports of incident relative to the conduct of Misa de Gallo,” matod ni de Leon. (JCT, AYB, FMD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph