UPAT ka konkretong poste nangatumba human nasangit sa hook sa boom sa usa ka truck nga nagkarga og mga scaffoldings alas 3:30 sa hapon sa Lunes, Disyembre 16, 2019, sa Hernan Cortes st., Subangdaku, Mandaue City.
Si Rammel Mahinay, 34, drayber sa truck, gikan niagi sa Subangdaku flyover ug wa makabantay nga nagsaka ang boom sa truck hinungdan nga nasangit sa mga wire sa kuryente.
Sigon ni Roberto Enriquez Jr., supervisor sa Subangdaku area sa Traffic Enforcement Agency of Mandaue (Team), nga niadtong orasa, mingaw ang kadalanan.
Suma pa niya nga kusog-kusog nga nagpadagan si Mahinay tungod kay palugsong sa flyover. Pagkabitad sa mga poste, ni-spark ang wires hinungdan sa pagdinaganay sa mga tawo ug niya.
Swerte nga way sakyanan nga nagsunod kay kon aduna pay nagsunod, way siguro nasunog na ang nagsunod.
Gikulata
Tungod sa kakurat sa mga tawo, pagkanaog ni Mahinay sa truck, gikulata kini sa mga tambay, apan daling giuwang tungod kay suma niya aksidente ang nahitabo.
Mikontak dayon si Enriquez sa Bureau of Fire Protection (BFP) aron moresponde sa aksidente labi na sa ni-spark ang mga linya.
Nahinabi sa Superbalita Cebu ang managtiayon nga silang Danilo, 47, ug Sabina Adolfo, kinsa namaligya og kwek-kwek kilid sa natumbang poste, niingon nga naswertihan sila nga wa sila matumbahi sa poste.
Si Danilo niingon nga naa siya atong tungora ug kalit ang panghitabo.
Lakip sab siya sa mga tawo nga nagdinaganay palayo sa poste.
Lakip sa mga miresponde mao ang Mandaue City Police Office ug Mandaue City Disaster Risk Reduction Management Office.
Gikontak sab dayon ang Visayan Electric Company aron ayuhon ang mga natumbang poste, dali sab dayon kini nilang gitrabaho.
“Our emergency crew are working on repairing the leaning poles. We assure our customers that we are doing our best to restore power in the affected areas as soon as possible,” matod ni Quennie Sanchez Bronze, tigpamaba sa Visayan Electric. (KFD)