MI-PLEAD guilty kun niangko nga sad-an si Nelson Siacor Torayno, 32, atol sa hearing sa iyang kaso sa Cebu City Regional Trial Court (RTC) Branch 11.
Si Torayno, giisip nga most wanted sa Europe Police (Europol), nadakpan sayong bahin sa 2019 human namaligya og child sexual exploitation materials, nga naglakip sa pagkuha og mga video sa iyang pag-abuso sa walo ka menor de edad nga mga lalake.
Nadakpan siya niadtong Abril 22, 2019, sa iyang giabangan nga kwarto sa Barangay Luz, Siyudad sa Sugbo human nalutsan og search warrant.
Nakaplagan sa mga awtoridad nga siya adunay daghang litrato ug video nga nagpakita nga nang-abuso sa mga menor de edad nga mga lalake.
Siya gipasakaan og kaso nga Anti-Trafficking in Persons Act o Republic Act 9208; RA 10175 o Cybercrime Prevention Act of 2012; RA 9775 o ang Anti-Child Pornography Act of 2009; ug RA 7610 o Child Abuse Law.
Niangkon si Torayno nga siya sad-an sa maong mga kaso ug gisentensyahan og 20 ka tuig nga pagkabilanggo.
Sigon ni Police Major Nino Lawrence Ibo, office-in-charge sa Women and Children’s Protection Central Visayas, nga si Torayno nagmahay na sa iyang gibuhat ug nisaad na nga di na usbon ang iyang gibuhat.
Nag-edad 9 hangtod sa 14 anyos ang walo ka mga biktima sa pang-abuso ni Torayno.
Duha niini taga Iligan City, diin siya nagtubo, ug unom niini taga Siyudad sa Sugbo.
Uban kanila kaila ra ni Torayno. Matod ni Ibo, ang mga bikitma mura ra og walay nahitabo sanglit hatagan og kwarta ni Torayno aron makaduwa sa internet cafe.
Gusto og bata
Sigon usab ni Ibo nga niangkon si Torayno nga siya bayot, apan gusto niya mga menor de edad kay di siya ganahan og mga hamtong.
“Iyang giangkon usab nga bayot sya pero iyang ganahan kay mga bata sad. Di siya ganahan og mga dagko. Pero menor ra gyud iyang ganahan. Dili sya ganahan og adult na,” matod ni Ibo.
Matod niya nga nabuhat to ni Torayno kay kini iyang kalingawan hangtod nga anaa siyay nakaila nga mga pareha niya.
Tungod niini, gusto usab siya nga mosikat sa dark web, diin adto ipamahin ang mga litrato sa iyang mga gipang-abuso.
“Pirmiro iya ra daw tong hobby niya ba. Kay naa siyay mga friends pud nga na meet online unya gipangayoan siya og mga ingon ato nga mga photos. So mao to siya. Pareha man daw sila og activity ato nga foreigner. So mao to gi-continue niya og paghimo ato nga abuse ang mga bata dayon iyang kuhaan og photo nya iyang i-send sa mga pedophile. Nagkadaghan ang iyang mga customer,” saysay niya.
Si Torayno anaa sa Cebu City Jail sa Barangay Kalunasan ug sa di madugay, ibalhin sa New Bilibid Prisons (NBP) sa Muntilupa City sa Metro Manila.