Espinoza: Proyekto gub-on aron ayuhon sab

GUBA-Ayo. Kon nakamatikod mo nga ig-abot sa buwan sa Oktubre dayon na sa Disyembre, kon sa hinanapos na sa tuig nga kalit lang nga daghan ang proyekto sa DPWH (Department of Public Works and Highways) sa atong kadalanan kon highway. Apan ang nakaparat kay ang kadaghanan sa highway nga giayo mga maayo pa ang espalto.

Ang rason, matud pa sa atong tinubdan, nga kalit lang daghan ang trabahuon sa mga highway aron mahurot og gasto ang pundo o budget sa tuig 2019. Gani, mao sad ni ang gibuhat sa uban nga ahensya sa goberno sama sa Department of Health (DOH) nga magsige og live-in seminar sa mga doktor sa mga local government unit (LGUs) bisan og mao lang gihapon ang gihisgutan.

Niadtong Sabado samtang padung ko sa Danao city, nakugang sa akong nagian sa dalan nga nagsumpay sa Liloan ug Compostela (dapit sa Barangay Cotcot) sa di pa moabot sa tulay kay giguba na ang espalto ug gisapawan og bag-o. Apan sa akong pag-agi sa miagi nga semana maayo pa man ang maong espalto.

Gikaras ang daan nga espalto nga maayo pa unya gisapawan og bag-o nga espalto apan ang iyang gibag-on, nga sa akong tan-aw wa gani moabot og unom ka pulgada. Magdugay kaha na nga espalto nga nipis ra man? Nakahibawo baya ta nga mga dagko nga sakyanan, sama sa bus ug trak de karga, ang moagi ani nga highway padung sa norte ug pabalik sa ilang destino.

Kon ang basihan sa paggasto sa pundo sa mga ahensya sa goberno sama sa DPWH tungod kay naghinapos na ang tuig mao nga gamiton na lang ang pundo sa pagguba-ayo sa mga dalan nga maayo pa, nganong di man adto gamiton ang maong pundo sa mga dapit o dalan nga angayan na nga ayohon? Ingon ani na lang ba gyud ang nahibaw-an sa DPWH?

Tungod sa ingon ani nga pamaagi sa mga ahensya sa goberno wa gihapon ta moasenso bisan pa sa kaadunahan sa atong nasud sa natural resources. Apan kon atong lili-on og maayo ang mga naa sa gobiyerno, morag sila ra ang miasenso. Di ni pagpangigi, pero tan-awa na sila di ba dunay bag-o nga sakyanan kada dunay proyekto?

Unya, naa tay Commission on Audit (COA) nga mao kunohay nagbantay sa pundo sa atong nasud apan kutob ra sa pagpadala og “notice of disallowance” sa mga ahensya nga nakasupak sa ilang lagda apan homana ang kasaypanan kon pag-usikusik sa nihit nga pundo sa atong nasud.

Wa pa ko makabasa o makabantay nga dunay napasakaan og sumbong sa COA sa mga opisyal sa mga ahensya sa kagamhanan nga nakita o napamatud-an nga giusikanang atong pundo sa atong nasud. Di ni pagtamay sa COA, apan ang akong naobserbahan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph