SA DIHANG gihinganlan ni Presidente Rodrigo Duterte si kanhi mayor ug karon Bise Mayor Mike Rama nga drug protector, wala ko motuo nga nahilambigit si Rama sa kalihukan sa illegal nga drugas. Bisan sa kategoriya nga kini tiggamitan. Apan unsaon nga ang Presidente naman sa nasud ang nihingalan kaniya nga naapil sa listahan sa narco-politics.
Apan hangtod karon nga napili siya isip bise mayor, wala pa siya mapasakai og kaso kalabot sa illegal nga drugas. Apan niining iyang baruganan karon nga dili niya tangtangon ang duha ka job order employees (JOs) nga naa sa iyang buhatan nga nag-positibo sa paggamit og illegal nga drugas human sa drug test nga gipahigayon sa Cosap, morag hapit naman hinuon ko motuo sa pasangil ni Duterte batok kang Mike. Pun-an pa anang iyang mga kalihukan nga dili masabot, na, mosamot na hinuon ang akong pagduda.
Sa 52 ka mga empleyado sa City Hall nga nagpositibo sa illegal nga drugas, duha niini ang anaa madestino sa iyang buhatan. Apan detailed lang ang maong mga empleyado sa legislative kay ang ilang mga original appointment diha sa Department fo Social Welfare and Services (DSWS) nga ubos sa buhatan sa mayor. Niangkon ang maong mga empleyado nga tiggamitan sila og illegal nga drugas sa dihang giimbestigar ni Jonah John Rodriguez, ang hepe sa Cosap.
Apan nagdumili si Mike sa pagtangtang kanila hangtod nga moabot ang confirmatory test gikan sa Department of Health (DOH) accredited nga laboratoryo sa kauluhan. Molanat pa og usa ka buwan usa mahibaw-an ang resulta. Ang nga (JOs) dali ra tangtangon kon masuta nga nagpositibo sila. Dili sama sa mga regular, casual og contractual nga hatagan pa og due process. Gumikan kay protektado man sila sa Civil Service Commission (CSC).
Ang mga job order employees nga ubos sa executive department o Mayor’s Office nga nagpositibo, hagbay rang gi-terminate na. Apan nganong mosukwahi si Rama sa polisiya ni Mayor Edgardo Labella? Kauban man kaha sila sa ilang kawsa? (bobbygnalzaro@gmail.com)