MAGSUGOD na og pagpanawat og aplikasyon sa special permits ang Land Transportation Franchising and Regulatory Board (LTFRB) 7 sugod Biyernes, Disyembre 20, 2019, diin molungtad kini hangtod Enero 4.
Kini aron mahatagan og kahigayonan kadtong mga bus nga makabiyahe sa dili niini rota.
Apan matod ni LTFRB 7 director Eduardo Montealto Jr., nga dili kaayo ingon niana kadaghan ang mokuha og special permit karong Pasko ug Bag-ong Tuig tungod kay wala kaayo mouliay niini.
Lahi kini sa mga nangagi nga bakasyon susama sa Kalag-Kalag ug Semana Santa nga dagsa ang mga pasahero ug daghan ang manguha og special permits.
Dugang ni Montealto nga mamahimo pang maakomodar sa kasamtangan nga mga rota sa bus ang mga pasahero.
Gani daghang mga bus operators ang anaay standby nga bus nga ilahang gamiton sa panahon nga magkinahanglan ug maggamit sa pagkuha sa special permit.
Anaa sa P350 ang bayad alang sa tulo ka adlaw nga special permit sa bus samtang ang jeep anaa usab sa P170 alang sa gamiton kini sa pamilya gawas sa rota niini.
Nipahimangno usab ang LTFRB 7 sa mga bus drivers ug operator nga bawal ang overloading sa mga pampubliko nga sakyanan.
Aduna’y pwede niini nga pipila ka tawo sa mga siyudad ug dakbayan apan sagad niini dili na pwede sa mga kalungsoran.
Lakip sa mamahimong modakop nila ang Highway Patrol Group ug ang Land Transporation Office.
Dili usab pwede ang kolurom nga mamahimong mopahimulos karong tingsakay, moabot sa P120,000 ang multa niini.(Superbalita Cebu)