NADAWAT na sa mga Ormocanong atleta sa Modern Pentathlon ang ilang cash incentive gikan sa national government tungod sa ilang paghatag og medalya sa Pilipinas sa 30th Southeast Asian Games.
Ang Gold Medalist makadawat og P850,000; ang Silver Medalist P300,000 ug P160,000 sa Bronze.
Base sa Republic Act 10699 kon “National Athletes and Coaches Benefits and Incentives Act” ang Bronze Medalist makadawat og P60,000; ang Silver Medalist P150,000 ug ang Gold Medalist P300,000.
Gawas niini, mihatag usab si Presidente Rodrigo Duterte og laing incentive diin ang Bronze nakadawat og P100,000; Silver P150,000 ug Gold P250,000.
Midugang usab og laing P300,000 ang Philippine Olympic Committee sa mga Gold Medalist.
Ang House of Representatives mo dugang usab og incentives sa Enero 2020.
Matod ni Ormoc City Mayor Richard Gomez, gawas sa gihatag nga mga incentives sa nasudnong kagamhanan, mohatag usab og incentive ang lokal nga kagamhanan sa Ormoc isip pahalipay sa mga atleta.
Gi-certify na usab sa Philippine Olympic Commission (POC) ang Philippine Modern Pentahtlon Association nga apil na sa regular member sa Philippine Olympic Committee.(Superbalita Cebu)